തൃശൂര്: വിയ്യൂര് അതീവ സുരക്ഷാ ജയിലില് ജീവനക്കാരനെ തടവുകാര് ആക്രമിച്ചു. ജീവനക്കാരനെ ആക്രമിക്കുന്നത് തടയാന് ശ്രമിച്ച മറ്റൊരു തടവുകാരനും പരിക്കേറ്റു.മുഖത്തും നെഞ്ചിലും പരിക്കേറ്റ അസിസ്റ്റന്റ് പ്രിസണ് ഓഫീസറായ അഭിനവ് (28) തടവുകാരനായ റെജി (56) എന്നിവരെ മുളങ്കുന്നത്തുകാവ് സര്ക്കാര് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
മനോജ്, അസറുദ്ദീന് എന്നിവരാണ് ആക്രമണം നടത്തിയത്.വ്യാഴാഴ്ച വൈകിട്ട് അഞ്ചരയ്ക്ക് ശേഷം സെല്ലില് കയറാന് വിസമ്മതിച്ചതിനെ ചോദ്യം ചെയ്തതില് പ്രകോപിതരായാണ് ഇവര് ജീവനക്കാരനെ കമ്പികൊണ്ട് ആക്രമിച്ചത്. അഭിനവിനെ തെറി വിളിക്കുകയും മര്ദ്ദിക്കുകയും ചെയ്തത് അസ്ഹറുദ്ദീനായിരുന്നു. ഇതിനെ അനുകൂലിച്ച് മുദ്രാവാക്യം മുഴക്കി മനോജെത്തുകയായിരുന്നു. തുടര്ന്ന് മനോജും മര്ദ്ദിച്ചു. വിയ്യൂര് പൊലീസ് കേസെടുത്തു.
അസറുദ്ദീന് 2022ലെ കോയമ്പത്തൂര് കാര് സ്ഫോടനക്കേസിലും 2019ലെ ശ്രീലങ്ക ഈസ്റ്റര് ബോംബാക്രമണവുമായി ബന്ധപ്പെട്ട കേസിലും പ്രതിയാണ് . 2019ല് എന്.ഐ.എ അറസ്റ്റ് ചെയ്ത ഇയാള്ക്കെതിരെ ഐ.എസ് ബന്ധം, തീവ്രവാദ റിക്രൂട്ട്മെന്റ് ഉള്പ്പെടെയുള്ള കേസും ചുമത്തിയിരുന്നു. ആഷിഖ് എന്ന പേരില് അറിയപ്പെടുന്ന മാവോയിസ്റ്റ് മനോജിനെ 2024 ജൂലായിലാണ് എറണാകുളം സൗത്ത് റെയില്വേ സ്റ്റേഷനില് നിന്ന് അറസ്റ്റ് ചെയ്തത്.
സംസ്ഥാനത്തെ ആദ്യത്തെ അതീവ സുരക്ഷാ ജയിലാണ് വിയ്യൂര് സെന്ട്രല് ജയില്. അത്യാധുനിക സുരക്ഷാ സംവിധാനങ്ങള് ഇവിടെയുണ്ട്. 600 തടവുകാരെ വരെ പാര്പ്പിക്കാനുള്ള ശേഷി ജയിലിനുണ്ട്. കണ്ണൂര് സെന്ട്രല് ജയിലില് നിന്ന് മതില് ചാടിയ കുപ്രസിദ്ധ കുറ്റവാളി ഗോവിന്ദച്ചാമിയെ പാര്പ്പിച്ചിരിക്കുന്നത് വിയൂര് സെന്ട്രല് ജയിലിലാണ്.
