ന്യൂദല്ഹി: ചെങ്കോട്ട മെട്രോസ്റ്റേഷന് സമീപമുണ്ടായ കാര് സ്ഫോടനം ദേശവിരുദ്ധ ശക്തികള് നടത്തിയ ഹീനമായ ഭീകര പ്രവര്ത്തനമെന്ന് (heinous terror incident) കേന്ദ്രസര്ക്കാര്. ഇന്നലെ പ്രധാനമന്ത്രി നരേന്ദ്രമോദിയുടെ അധ്യക്ഷതയില് ചേര്ന്ന മന്ത്രിസഭാസമിതിയോഗം സ്ഫോടനത്തെ അപലപിക്കുകയും അഗാധമായ ദുഃഖം രേഖപ്പെടുത്തുകയും ചെയ്തു. നിരപരാധികളായ, ജീവന് നഷ്ടപ്പെട്ടവര്ക്ക് ആദരാഞ്ജലി അര്പ്പിച്ച് മന്ത്രിസഭ രണ്ട് മിനിറ്റ് മൗനം ആചരിച്ചു.
സമഗ്രമായ അന്വേഷണം എത്രയും വേഗത്തില് പൂര്ത്തിയാക്കും. കുറ്റവാളികളായ എല്ലാവര്ക്കും ശിക്ഷ ഉറപ്പാക്കും. സ്ഫോടനത്തിന് പിന്നില് പ്രവര്ത്തിച്ചവര്, പിന്തുണ നല്കിയവര്, സഹകരിച്ചവര്, സ്പോണ്സര്മാര് എന്നിവരെ പിടികൂടി ഉടന് നീതിപീഠത്തിന് മുന്നില് കൊണ്ടുവരുമെന്ന് യോഗം അംഗീകരിച്ച പ്രമേയം വ്യക്തമാക്കുന്നു. എല്ലാ രൂപങ്ങളിലുമുള്ള ഭീകരതയോടും അതിന്റെ പ്രകടനങ്ങളോടും ഭാരതം വിട്ടുവീഴ്ചയില്ലാത്ത നിലപാട് തുടരുമെന്ന് മന്ത്രിസഭ പ്രമേയത്തില് ആവര്ത്തിച്ചു.
നിരപരാധികളുടെ ജീവന് നഷ്ടപ്പെടുന്നതിലേക്ക് നയിച്ച നിന്ദ്യവും ഭീരുത്വപരവുമായ പ്രവൃത്തിയെ മന്ത്രിസഭ അപലപിച്ചു. മരിച്ചവര്ക്ക് ആദരാഞ്ജലി അര്പ്പിക്കുകയും ദുഃഖിതരായ കുടുംബങ്ങള്ക്ക് അനുശോചനം അറിയിക്കുകയും ചെയ്തു.
ലോക് കല്യാണ് മാര്ഗിലെ പ്രധാനമന്ത്രിയുടെ ഔദ്യോഗിക വസതിയിലായിരുന്നു യോഗം. പ്രതിരോധമന്ത്രി രാജ്നാഥ് സിങ്, ആഭ്യന്തരമന്ത്രി അമിത് ഷാ, വാര്ത്താ വിതരണ പ്രക്ഷേപണ മന്ത്രി അശ്വിനി വൈഷ്ണവ് തുടങ്ങിയവര് യോഗത്തില് പങ്കെടുത്തു.
