ഇടുക്കി: മൂന്നാറില് വീണ്ടും ഓണ്ലൈന് ടാക്സി ഡ്രൈവറെ തടഞ്ഞതായി പരാതി.ഇവിടത്തെ ടാക്സി ഡ്രൈവര്മാരാണ് വിദേശ വിനോദ സഞ്ചാരികളെ തടഞ്ഞത്.
ഇസ്രായേലില് നിന്നുള്ള വനിതകളെയാണ് ഡ്രൈവര്മാര് തടഞ്ഞത്.വിനോദ സഞ്ചാരികള് മൂന്നാറില് നിന്ന് കൊച്ചിയിലേക്ക് ഓണ്ലൈന് ടാക്സിയില് പോകാന് തുടങ്ങുന്നതിനിടയാണ് സംഭവം. ഓണ്ലൈന് ടാക്സി ഡ്രൈവര് മൂന്നാര് പൊലീസിനെ വിവരമറിയിച്ചതിനെ തുടര്ന്ന് പൊലീസ് ഇടപെട്ട് ഓണ്ലൈന് ടാക്സിയില് വിദേശ വനിതകള്ക്ക് യാത്ര തുടരാന് അവസരം ഒരുക്കി. പരാതി ഇല്ലാത്തതിനാല് കേസ് എടുത്തില്ല.
മുന്പും സമാന സംഭവം ഉണ്ടായിട്ടുണ്ട്.ഓണ്ലൈന് ടാക്സി ഡ്രൈവര്മാരെ പലസ്ഥലങ്ങളിലും പരമ്പരാഗത ടാക്സി ഡ്രൈവര്മാര് തടയുന്നതിനെതിരെ ഗതാഗത മന്ത്രി കെ ബി ഗണേഷ് കുമാര് രംഗത്തെത്തിയിരുന്നു. ഗുണ്ടായിസം നടത്തുന്നവരെ സര്ക്കാര് ശക്തമായി നേരിടുമെന്നും അക്രമികളുടെ ലൈസന്സ് റദ്ദാക്കുമെന്നും മന്ത്രി പറഞ്ഞിരുന്നു.
എന്നാല് ടാക്സി ഡ്രൈവര്മാര് തമ്മില് തല്ലുന്നതിന് കാരണം സര്ക്കാരാണെന്നാണ് ഓണ്ലൈന് ടാക്സി ഡ്രൈവര്മാര് പറയുന്നത്.ഹൈക്കോടതിയടക്കം ഇടപെട്ടിട്ടും അഗ്രിഗേറ്റര്സ് പോളിസി നടപ്പിലാക്കാന് സംസ്ഥാന സര്ക്കാര് ഇതുവരെ തയാറായിട്ടില്ലെന്നും ഓണ്ലൈന് ടാക്സി ഡ്രൈവര്മാര് കുറ്റപ്പെടുത്തുന്നു. ടൂറിസം കേന്ദ്രങ്ങളിലടക്കം വളഞ്ഞിട്ട് തല്ലുന്നത് ഒഴിവാക്കാന് സര്ക്കാര് ഇടപെടണമെന്നും ഇവര് ആവശ്യപ്പെട്ടു.
