തിരുവനന്തപുരം: വന്ദേഭാരത് എക്‌സ്പ്രസ് ഉദ്ഘാടന യാത്രയില്‍, പരമ പവിത്രമാണീ മണ്ണെന്നും ഇവിടെ ഞങ്ങള്‍ ഭാരതാംബയെ പൂജിക്കുമെന്നും പാടിയാഘോഷിച്ച കുരുന്നുകള്‍ പ്രോത്സാഹനം അര്‍ഹിക്കുന്നവരാണെന്നും അവര്‍ക്കോ അവര്‍ പഠിക്കുന്ന എളമക്കര സരസ്വതി വിദ്യാനികേതനോ എതിരെ നടപടിക്ക് സാദ്ധ്യതകള്‍ തേടുന്നെങ്കില്‍ അത് സംസ്ഥാന ഭരണകൂടത്തിന്റെ ഫാസിസ്റ്റ് മനോഭാവമാണ് പ്രകടമാക്കുന്നതെന്നും ആര്‍ഷ സാഹിത്യ പരിഷത്ത് അദ്ധ്യക്ഷന്‍ ഡോ. കെ.സി. അജയകുമാറും ജനറല്‍ സെക്രട്ടറി ജെ. സോമശേഖരന്‍ പിള്ളയും പ്രസ്താവിച്ചു.
1904 ല്‍ ‘സാരേ ജഹാംസേ അച്ഛാ ഹിന്ദോസിതാ ഹമാരാ’ എന്ന ഗാനം എഴുതിയ ഇഖ്ബാല്‍ പിന്നീട് വര്‍ഗീയവാദിയും വിഘടനവാദിയുമായി മാറി, ദേശീയ ജനസമൂഹത്തെ തകര്‍ത്ത് പാക്കിസ്ഥാന്‍ നേടിയെടുത്തു. പക്ഷേ ആ ഗാനം ഇന്നും ദേശഭക്തര്‍ ആവേശത്തോടുകൂടി ആലപിക്കും.
ഇഖ്ബാലിന്റെ പാട്ടായതുകൊണ്ട് അതുമാത്രമേ ഞങ്ങള്‍ പാടൂയെന്ന് ഏതെങ്കിലും രാഷ്‌ട്രിയപക്ഷം നിര്‍ബന്ധം പിടിച്ചാലും പോകട്ടെയെന്നു കരുതും. പക്ഷേ പി. പരമേശ്വരനെ പോലെയുള്ളവര്‍ പേരുവെക്കാതെയും ഒ.എന്‍.വിയെ പോലുള്ളവര്‍ പേരുവെച്ചും എഴുതിയ ദേശഭക്തി ഗാനങ്ങള്‍ ആര്‍എസ്എസ് കാര്യക്രമങ്ങളില്‍ പാടുന്നുയെന്നതുകൊണ്ട് പൊതുയിടങ്ങളില്‍ പാടില്ലായെന്ന് പറയുന്നവരുടെ ഉള്ളിലെ വര്‍ഗീയ വികാരവും രാഷ്‌ട്രീയലക്ഷ്യങ്ങളും പൊതുസമൂഹം തിരിച്ചറിയണമെന്ന് അവര്‍ പ്രസ്താവനയില്‍ ആഹ്വാനം ചെയ്തു.
