കൊച്ചി: മൂന്നാറില് വിനോദസഞ്ചാരികള്ക്കു നേരെ ആക്രമണം നടത്തുകയും . സ്ത്രീകളെ അസഭ്യം പറയുകയും ചെയ്ത ഓട്ടോഡ്രൈവറെ പൊലീസ് അറസ്റ്റ് ചെയ്തു. കോയമ്പത്തൂര് അരവക്കുറിച്ചി എംഎല്എ ആര് ഇളങ്കോയുടെ മകളും ഭര്ത്താവും രണ്ടു ബന്ധുക്കളും സഞ്ചരിച്ചിരുന്ന കാറും സുരേന്ദ്രന് ഓടിച്ചിരുന്ന ഓട്ടോയും കൂട്ടിയിടിച്ചതാണ് സംഭവങ്ങള്ക്കു തുടക്കം.
അടിമാലിയില് താമസിക്കുന്ന, മാട്ടുപ്പെട്ടി കൊരണ്ടക്കാട് സ്വദേശി എസ് സുരേന്ദ്രനാണ് (29) അറസ്റ്റിലായത്. എംഎല്എയുടെ മരുമകന് കെ അരവിന്ദ് രാജിനെ ഇയാള് കഴുത്തിനു പിടിച്ച് തള്ളുകയും കല്ലുകൊണ്ട് ഇടിക്കാന് ശ്രമിക്കുകയും ചെയ്തു. നാട്ടുകാരാണ് അരവിന്ദിന രക്ഷിച്ചത്. സ്ത്രീകള്ക്കുനേരെയും അക്രമണശ്രമമുണ്ടായി. ഓട്ടോഡ്രൈവര് മദ്യലഹരിയിലായിരുന്നെന്ന് പൊലീസ് പറഞ്ഞു. ഓട്ടോറിക്ഷ പിടിച്ചെടുത്തതായും ഇയാളുടെ ലൈസന്സ് റദ്ദാക്കാനുള്ള നടപടികള് ആരംഭിച്ചതായും പൊലീസ് അറിയിച്ചു. അടുത്തിടെ വിദേശവനിതയടക്കമുള്ള വിനോദസഞ്ചാരികള്ക്കു നേരെ മൂന്നാറില് വേറെയും അതിക്രമങ്ങള് നടന്നിരുന്നു.
