കൊച്ചി : വന്ദേഭാരതിൽ സ്കൂൾ കുട്ടികൾ ആർ എസ് എസ് ഗണഗീതം പാടിയതിനെ പ്രശംസിച്ച് നടൻ സന്തോഷ് പണ്ഡിറ്റ് . ട്രെയിനിൽ പാടിയതിൽ റെയിൽ വേയ്ക്കില്ലാത്ത പരാതി കണ്ടുനിന്നവർക്ക് എന്തിനാണെന്നും സന്തോഷ് പണ്ഡിറ്റ് ചോദിക്കുന്നു .
‘ സ്കൂൾ കുട്ടികൾ ടൂറിന് പോകുമ്പോൾ എന്തൊക്കെ പാടുന്നു , അതിന്റെ പേരിൽ ആ സ്കൂളിന്റെ എൻ ഒ സി റദ്ദാക്കാൻ പറ്റുമോ . അവർ പാടിയത് കള്ളിന്റെ ഗുണഗണങ്ങളെ കുറിച്ചുള്ള പാട്ടല്ലല്ലോ. അവർ കഞ്ചാവടിച്ച് കുറുങ്ങി എന്ന പാട്ടല്ലല്ലോ പാടിയത്. മോഡേൺ സാംസ്ക്കാരിക നായകർ എഴുതിയ തെറിപ്പാട്ടല്ലല്ലോ പാടിയത് . ചില പുതിയ സാംസ്ക്കാരിക താരങ്ങൾ എഴുതിയതല്ലല്ലോ പാടിയത്.
അവലും, മലരും, കുന്തിരിക്കവുമല്ലല്ലോ അവർ പാടിയത്. ഇവിടെ ചില സ്കൂൾ കുട്ടികൾ പാലസ്തീന് വേണ്ടി മുദ്രാവാക്യം വിളിക്കുന്നു, പാട്ടുപാടുന്നു, കൊടി പിടിക്കുന്നു. ഇവർ ഒന്നുമില്ലെങ്കിലും ദേശഭക്തി ഗാനമല്ലേ പാടിയത് . മറ്റ് രാജ്യക്കാർക്ക് വേണ്ടിയല്ലല്ലോ പാടിയത് . സ്വന്തം രാജ്യത്തിന് വേണ്ടിയല്ലേ. അപ്പോൾ എങ്ങനെ എൻ ഒ സി റദ്ദാക്കും , അത് എങ്ങനെ കോടതിയിൽ തെളിയിക്കും .
ഇവിടെ മറ്റ് സ്കൂളുകളിലെ കുട്ടികൾ മതപരമായ പാട്ടുകൾ പാടാറില്ലേ. എത്രയോ കുട്ടികൾ മതവും, രാഷ്ട്രീയവും പറയുന്ന എത്രയോ വീഡിയോകൾ ഇവിടെയുണ്ട്. അങ്ങനെയെങ്കിൽ എൻ ഒ സി റദ്ദാക്കനല്ലേ സമയമുണ്ടാകൂ. ഗണഗീതം പാടിയാൽ എൻ ഒ സി റദ്ദാക്കാമെന്ന നിയമം ഇന്ത്യയ്ക്കുണ്ടോ ‘ എന്നും സന്തോഷ് പണ്ഡിറ്റ് ചോദിക്കുന്നു.
