പാലക്കാട്: കഴിഞ്ഞ 30 വര്ഷത്തില് കൂടുതലായി ജന്മിയുടെ അവശേഷിക്കുന്ന രണ്ടര സെന്റ് ഭൂമിയില് കുടില് കെട്ടി താമസിക്കുകയാണ് 75കാരനായ മരുതന്. പുതുശേരി പഞ്ചായത്തിലെ വാര്ഡ് 15ല് ഉള്പ്പെടുന്ന ഉല്ലാസ് നഗറില് ഷീറ്റു കൊണ്ടു മറച്ച ഒറ്റ മുറി ഷെഡ്ഡില് മരുതന്റെ താമസവും തനിച്ചാണ്. വാര്ദ്ധക്യ പെന്ഷനാണ് ഏക വരുമാന മാര്ഗം. പഞ്ചായത്ത് രേഖകളില് അതിദരിദ്രനാണ് മരുതന്.
മുന്ഗണന വിഭാഗമായ പിഎച്ച്എച്ചില് ഉള്പ്പെട്ടിട്ടുള്ള റേഷന് കാര്ഡാണ് മരുതന്റേത്. അതുകൊണ്ടുതന്നെ റേഷന് വിഹിതങ്ങള്ക്ക് സബ്സിഡി കിട്ടുമെന്നതല്ലാതെ സൗജന്യങ്ങളേതുമില്ലെന്നാണ് ഈ വയോധികന് പറയുന്നത്. അതിദാരിദ്ര്യമുക്ത പ്രഖ്യാനം കഴിഞ്ഞിട്ടും ഈ വയോധികന്റെ ദുരിതാവസ്ഥക്ക് ഒരു കുറവും വന്നിട്ടില്ല… സ്വന്തമായി വീടില്ല, വെള്ളമില്ല. കറന്റ് ബില്ലു പോലും സൗജന്യമാക്കി നല്കാന് കെഎസ്ഇബി അധികൃതരും ശ്രമിച്ചിട്ടില്ല. പലതവണ ഉദ്യോഗസ്ഥരോട് ആവശ്യപ്പെട്ടുവെങ്കിലും സഹായം ചെയ്തുതന്നില്ലെന്ന് ഇദ്ദേഹം പറയുന്നു.
കിട്ടുന്ന ക്ഷേമപെന്ഷന് കൊണ്ടാണ് ജീവിതം മുന്നോട്ടു പോകുന്നത്. അതിനിടയില് വല്ല അസുഖവും വന്നാല് എല്ലാം താളം തെറ്റും. ഏങ്കിലും ആരോടും പരാതിയില്ല പരിഭവമില്ല… കേരളത്തില് ഇനി അതിദാരിദ്രരില്ലല്ലോ…
ഇത് മരുതന്റെ മാത്രം അവസ്ഥയല്ല… കേരളം അതിദാരിദ്ര്യമുക്തമായെന്ന് സംസ്ഥാന സര്ക്കാര് പ്രഖ്യാപിച്ചപ്പോള് മരുതനെപ്പോലെയുള്ളവരെ ഇവര് കണക്കുകളില് ഉള്പ്പെടുത്തിയിട്ടില്ലേ അതോ സൗകര്യപൂര്വം ഒഴുവാക്കിയോ എന്ന ചോദ്യമാണുയരുന്നത്. ഇത്തരക്കാര് ഇനി എന്തു ചെയ്യുമെന്ന് കൂടി സര്ക്കാര് പറയണം.
