തിരുവനന്തപുരം: വര്ക്കലയില് മദ്യപന് ട്രെയിനില് നിന്ന് തള്ളിയിട്ട യുവതിയുടെ ആരോഗ്യനില ഗുരുതരമായി തുടരുന്നെന്ന് തിരുവനന്തപുരം മെഡിക്കല് കോളേജ് ആശുപത്രി അധികൃതര്. എന്നാല് ആശുപത്രിയില് എത്തിയതിനേക്കാള് നില മെച്ചപ്പെട്ടു. സാധ്യമായ എല്ലാ ചികിത്സയും നല്കുന്നുവെന്നും ആശുപത്രി അധികൃതര് അറിയിച്ചു.
അപകടാവസ്ഥ തരണം ചെയ്തെന്ന് പറയാന് കഴിയില്ല. പെണ്കുട്ടി 48 മണിക്കൂര് നിരീക്ഷണത്തിലാണ്. ഇതിന് ശേഷം മാത്രമേ പെണ്കുട്ടി പൂര്ണ ആരോഗ്യ സ്ഥിതിയിലേക്ക് മടങ്ങിവരുന്ന കാര്യത്തില് എന്തെങ്കിലും പറയാന് കഴിയൂ എന്ന് ആശുപത്രി അധികൃതര് പറയുന്നു. തലയില് പലയിടത്തും ചതവുകളുണ്ട്. ഇത് സുഖപ്പെടാന് സമയമെടുക്കും.
തിരുവനന്തപുരം പാലോട് സ്വദേശിനിയായ 19 കാരി ശ്രീക്കുട്ടി (സോനു)ക്കെതിരെയുളള അതിക്രമത്തില് ഗുരുതര പരാമര്ശങ്ങളാണ് എഫ് ഐ ആറിലുള്ളത്. വെള്ളറട പനച്ചുമൂട് സ്വദേശി സുരേഷ് കുമാര് കൊലപ്പെടുത്തണമെന്ന ഉദ്ദേശത്തോടെയാണ് പെണ്കുട്ടിയെ ട്രെയിനില് നിന്നും തള്ളിയിട്ടത്. നടുവിന് ചവിട്ടി പുറത്തേക്കിട്ട ശേഷം സഹയാത്രികയെയും തള്ളിയിടാന് ശ്രമിച്ചു. കുറ്റസമ്മതം നടത്തിയ ഇയാളെ ട്രെയിനില് ഉണ്ടായിരുന്ന യാത്രക്കാര് തിരിച്ചറിഞ്ഞു.
