മുംബൈ: ഹൃദയം തൊടുന്ന തന്റെ രാഷ്ട്രീയം വീണ്ടും പുറത്തെടുത്ത് പ്രധാനമന്ത്രി മോദി. ആരോഗ്യപ്രശ്നം കാരണം രാഷ്ടീയ പൊതുജീവിതത്തില് നിന്നും പൂര്ണ്ണമായും വിട്ടുനില്ക്കുമെന്ന് പ്രഖ്യാപിച്ച മഹാരാഷ്ട്രയിലെ ബിജെപി സര്ക്കാരിന്റെ കടുത്ത എതിരാളിയായ സഞ്ജയ് റാവുത്തിന് സുഖം ആശംസിച്ച് മോദി.
കടുത്ത രോഗബാധ മൂലം താന് രാഷ്ട്രീയത്തില് നിന്നും താല്ക്കാലികമായി വിടവാങ്ങുകയാണെന്ന് ശിവസേന (ഉദ്ധവ് വിഭാഗം) വക്താവ് സഞ്ജയ് റാവുത്ത് കഴിഞ്ഞ ദിവസമാണ് ലോകത്തെ അറിയിച്ചത്. ഉടനെ എക്സില് മറ്റാരേക്കാളും വേഗത്തില് മോദിയുടെ മറുപടിയാണ് വന്നത്. വേഗം സുഖമാകട്ടെയെന്നായിരുന്നു മോദി ആശംസിച്ചത്.
ഗൗരവമായ ആരോഗ്യപ്രശ്നം കാരണം രാഷ്ടീയപൊതുജീവിതത്തില് നിന്നും വിട്ടുനില്ക്കുകയാണെന്ന സഞ്ജയ് റാവുത്തിന്റെ വെളിപ്പെടുത്തല് അത്ഭുതത്തോടെയാണ് രാഷ്ട്രീയ ലോകം കേട്ടത്. കാരണം മഹാരാഷ്ട്രയിലെ രാഷ്ട്രീയത്തില് അളന്നുമുറിച്ച പ്രസ്താവനകളാലും തീപ്പൊരി ചിതറുന്ന വാര്ത്താസമ്മേളനങ്ങളാലും എപ്പോഴും രാഷ്ട്രീയകേന്ദ്രബിന്ദുവായി മാറുന്ന രാഷ്ട്രീയക്കാരനായിരുന്നു സഞ്ജയ് റാവുത്ത്.
പക്ഷെ സഞ്ജയ് റാവുത്തിന്റെ ഈ വാര്ത്തയോട് പ്രധാനമന്ത്രി മോദിയില് നിന്നും തികച്ചും അപ്രതീക്ഷിതമായി ഒരു സാന്ത്വന മറുപടി കിട്ടിയത് സഞ്ജയ് റാവുത്തിനെയും കുടുംബത്തെയും അത്ഭുതപ്പെടുത്തി. അതാണ് മോദിയുടെ രാഷട്രീയത്തിലെ പേഴ്സണല് ടച്ച്. ഉടനെ സഞ്ജയ് റാവുത്ത് മോദിയ്ക്ക് എക്സില് മറുപടിയും നല്കി. ” ബഹുമാനപ്പെട്ട പ്രധാനമന്ത്രി നന്ദി. എന്റെ കുടുംബം താങ്കളോട് നന്ദിയുള്ളവരായിരിക്കും. ജയ് ഹിന്ദ്, ജയ് മഹാരാഷ്ട്ര.”.
ഇതാണ് മോദിയുടെ രാഷ്ട്രീയം. രാഷ്ട്രീയഗോദയില് വിട്ടുവീഴ്ചയില്ലാതെ ഏറ്റുമുട്ടുമ്പോഴും എത്ര ശത്രുവായാലും അയാളുടെ വ്യക്തിജീവിതത്തിലെ ആഘാതങ്ങളേയും നഷ്ടങ്ങളേയും അങ്ങേയറ്റം സഹാനുഭൂതിയോടെ കാണുന്ന മോദിയുടെ രാഷ്ട്രീയം മറ്റുവരില് നിന്നും വ്യത്യസ്തമാണ്. അതുകൊണ്ടാണ് മോദി വേറിട്ട് നേതാവാകുന്നത്.
