തിരുവനന്തപുരം: മുഖ്യമന്ത്രി പിണറായി വിജയനെതിരായ അധിക്ഷേപ പ്രസംഗം നടത്തിയ മുസ്ലീം ലീഗ് ജനറല് സെക്രട്ടറി പി.എം.എ. സലാമിനെതിരെ പൊലീസില് പരാതി.സിപിഎം പ്രവര്ത്തകന് വാഴക്കാട് സ്വദേശി മുഹമ്മദ് ജിഫ്രി തങ്ങളാണ് പരാതി നല്കിയത്.
വഴക്കാട് പൊലീസ് സ്റ്റേഷനിലാണ് പരാതി.സലാമിന്റെ അധിക്ഷേപ പരാമര്ശത്തെ മുസ്ലിം ലീഗ് തള്ളി. വിമര്ശനങ്ങള് വ്യക്തിപരമായ അധിക്ഷേപങ്ങളിലേക്ക് പോകരുതെന്ന് അധ്യക്ഷന് പാണക്കാട് സാദിഖലി ശിഹാബ് തങ്ങള് പറഞ്ഞു. പരാമര്ശത്തിനെതിരെ പ്രതിഷേധം ശക്തമായതോടെയാണ് പിഎംഎ സലാമിന്റെ നിലപാടിനെതിരെ സാദിഖലി ശിഹാബ് തങ്ങള് രംഗത്തെത്തിയത്.
പിഎംഎ സലാമിന്റെ മുഖ്യമന്ത്രിക്കെതിരായ പരാമര്ശം സംബന്ധിച്ച്, ലീഗിന് ഒരു രീതി ഉണ്ടെന്നും അന്തസോടെ ആണ് പ്രതികരിക്കാറുള്ളതെന്നും പി. കെ കുഞ്ഞാലിക്കുട്ടി പറഞ്ഞു. വ്യക്തി അധിക്ഷേപം ലീഗിന്റെ രീതി അല്ലെന്ന് അദേഹം വ്യക്തമാക്കി. പ്രതിപക്ഷ ബഹുമാനത്തോടെ സംസാരിക്കുന്ന രീതി ആണ് ലീഗിന്.എന്നാല് ചില സമയം നാക്കുപിഴ സംഭവിക്കും. പിഎംഎ സലാമിനെ സംസ്ഥാന പ്രസിഡന്റ് തന്നെ തിരുത്തിയിട്ടുണ്ടെന്ന് കുഞ്ഞാലിക്കുട്ടി പറഞ്ഞു.
