കോഴിക്കോട് : കേരളത്തിനെ അതിദാരിദ്ര്യ മുക്തമായി പ്രഖ്യാപിച്ചതില് സംസ്ഥാന സര്ക്കാരിനെ വിമര്ശിച്ച് പി കെ കുഞ്ഞാലിക്കുട്ടി.കേരളത്തിലെ ഏറ്റവും വലിയ അതിദരിദ്രന് സംസ്ഥാന സര്ക്കാരാണെന്ന് അദ്ദേഹം പറഞ്ഞു.അത്യാവശ്യത്തിന് പോലും സര്ക്കാരിന്റെ പക്കല് കാശില്ലെന്നും ഇത് ജനങ്ങളെ മുഴുവന് ബാധിക്കുമെന്നും പികെ കുഞ്ഞാലിക്കുട്ടി പറഞ്ഞു
അതിദാരിദ്ര്യ മുക്ത പ്രഖ്യാപനം നടത്തിയതോടെ പല കേന്ദ്ര പദ്ധതികള്ക്കും പണം ലഭിക്കാതാകും. സംസ്ഥാനത്ത് ചെലവ് ചുരുക്കല് നടക്കുന്നില്ല. പ്രഖ്യാപനം സംസ്ഥാന സര്ക്കാരിന് തിരിച്ചടി ആകും. ബദല് മാര്ഗം യുഡിഎഫ് കൊണ്ട് വരുമെന്ന് പികെ കുഞ്ഞാലിക്കുട്ടി പറഞ്ഞു.
മുഖ്യമന്ത്രിക്ക് എതിരെ മുസ്ലിം ലീഗ് സംസ്ഥാന ജനറല് സെക്രട്ടറി പിഎംഎ സലാം നടത്തിയ പരാമര്ശം സംബന്ധിച്ച്, ലീഗിന് ഒരു രീതി ഉണ്ടെന്നും അന്തസോടെ ആണ് പ്രതികരിക്കാറുള്ളതെന്നും പികെ കുഞ്ഞാലിക്കുട്ടി പറഞ്ഞു. വ്യക്തി അധിക്ഷേപം ലീഗിന്റെ രീതി അല്ല.പ്രതിപക്ഷ ബഹുമാനത്തോടെ സംസാരിക്കുന്ന രീതി ആണ് ലീഗിന്.എന്നാല് ചില സമയത്ത് നാക്കുപിഴ സംഭവിക്കും. പിഎംഎ സലാമിനെ സംസ്ഥാന പ്രസിഡന്റ് തന്നെ തിരുത്തിയിട്ടുണ്ടെന്ന് കുഞ്ഞാലിക്കുട്ടി പറഞ്ഞു.
പാര്ട്ടി രീതി എന്താണെന്ന് സംസ്ഥാന അധ്യക്ഷന് പറഞ്ഞിട്ടുണ്ട്. നാക്ക് പിഴ ആര്ക്കും സംഭവിക്കാം. തനിക്ക് സംഭവിച്ചാലും പാര്ട്ടി തിരുത്തുമെന്ന് പികെ കുഞ്ഞാലിക്കുട്ടി കൂട്ടിച്ചേര്ത്തു. മുഖ്യമന്ത്രി ആണും പെണ്ണും കെട്ടവനായത് കൊണ്ടാണ് പി എം ശ്രീയില് ഒപ്പുവെച്ചതെന്നായിരുന്നു മുസ്ലിം ലീഗ് സംസ്ഥാന ജനറല് സെക്രട്ടറി പി എം എ സലാമിന്റെ അധിക്ഷേപ പരാമര്ശം. മുഖ്യമന്ത്രിക്കെതിരായ അധിക്ഷേപ പരാമര്ശത്തില് മുസ്ലിം ലീഗ് സംസ്ഥാന ജനറല് സെക്രട്ടറി പി എം എ സലാം മാപ്പ് പറയണമെന്ന് സിപിഎം ആവശ്യപ്പെട്ടിരുന്നു.
