തിരുവനന്തപുരം : നെല്ല് സംഭരണത്തിന് രണ്ട് മില്ലുകളുമായി കരാര് ഒപ്പിട്ടു. മുഖ്യമന്ത്രിയുടെ നേതൃത്വത്തില് ചര്ച്ച നടത്തിയിട്ടും മില്ലുടമകള് സഹകരിക്കാതിരുന്ന സാഹചര്യത്തില് ഭക്ഷ്യമന്ത്രിയുടെ ഓഫീസ് ഇടപെട്ട് രണ്ട് മില്ലുകളുമായി ധാരണയിലെത്തി. തൃശൂരില് നിന്നും ആലപ്പുഴയില് നിന്നും ഇന്ന് തന്നെ നെല്ല് സംഭരിച്ചു തുടങ്ങും.
മില്ലുടമകള് മുന്നോട്ടുവെച്ച രണ്ട് ആവശ്യങ്ങളില് ഒരു ആവശ്യം മുഖ്യമന്ത്രിയുടെ നേതൃത്വത്തിലുള്ള സമിതി നേരത്തെ അംഗീകരിച്ചിരുന്നു. 100 ക്വിന്റല് നെല് സംഭരിക്കുമ്പോള് 66.5 ക്വിന്റല് അരിയാക്കി നല്കിയാല് മതിയെന്ന് തീരുമാനിച്ചിരുന്നു. എന്നാല് കുടിശിക ഇതുവരെ അനുവദിച്ചിരുന്നില്ല. കുടിശികത്തുക കൊടുക്കുമെന്ന ഉറപ്പിനെ തുടര്ന്നാണ് രണ്ട് മില്ലുകള് ഇപ്പോള് സര്ക്കാരുമായി ധാരണയിലെത്തിയത്.
നെല്ല് സംസ്ക്കരണ മില്ലുടമകള്ക്ക് 2022-23 സംഭരണ വര്ഷം ഔട്ട് ടേണ് റേഷ്യോയുമായി ബന്ധപ്പെട്ട് നല്കാനുള്ള നഷ്ടപരിഹാര തുകയായ 63.37 കോടി രൂപ അനുവദിക്കുന്ന കാര്യം മന്ത്രിസഭ പരിഗണിക്കുമെന്ന് മില്ലുടമകളുടെ യോഗത്തില് മുഖ്യമന്ത്രി പിണറായി വിജയന് പറഞ്ഞിരുന്നു.നെല്ല് കടത്തുന്നതുമായി ബന്ധപ്പെട്ട കടത്തു കൂലി അനുവദിച്ചു നല്കാന് കേന്ദ്ര സര്ക്കാരിനോട് ആവശ്യപ്പെട്ടിടുണ്ട്.
