ഗുവാഹത്തി : അസം സംസ്ഥാന കോൺഗ്രസ് പ്രസിഡന്റും എംപിയുമായ ഗൗരവ് ഗൊഗോയ് ഒരു പാകിസ്ഥാൻ ഏജന്റ് ആണെന്ന് വിമർശിച്ച് അസം മുഖ്യമന്ത്രി ഹിമന്ത ബിശ്വ ശർമ്മ. ബ്രിട്ടീഷ് ഭാര്യ വഴി ഗോഗോയിക്ക് പാകിസ്ഥാൻ ബന്ധമുണ്ടെന്നും ശർമ്മ ആരോപിച്ചു.
ഗൗരവ് ഗൊഗോയ് ഒരു പാകിസ്ഥാൻ ഏജന്റാണ്. വിദേശ സേനകളാണ് അദ്ദേഹത്തെ നമ്മുടെ രാജ്യത്ത് പ്രതിഷ്ഠിച്ചിരിക്കുന്നതെന്നാണ് അസം മുഖ്യമന്ത്രി ശർമ്മ ഗുവാഹത്തിയിൽ മാധ്യമങ്ങളോട് പറഞ്ഞത്. ഗായകൻ സുബിൻ ഗാർഗിന്റെ മരണത്തെക്കുറിച്ചുള്ള അന്വേഷണം പൂർത്തിയായിക്കഴിഞ്ഞാൽ ഗോഗോയിക്കെതിരായ തെളിവുകൾ പുറത്തുവിടുമെന്ന് ഹിമന്ത ശർമ്മ പറഞ്ഞു. സുബിൻ ഗാർഗ് വിഷയം പാളം തെറ്റുകയാണെന്ന് ചിലർ പറയുമെന്നതിനാൽ തെളിവുകൾ പങ്കിടാൻ ഞാൻ ഇപ്പോൾ ഒരു പത്രസമ്മേളനം നടത്തുന്നില്ലെന്നും അദ്ദേഹം പറഞ്ഞു.
അസം മുൻ മുഖ്യമന്ത്രി തരുൺ ഗൊഗോയിയുടെ മകനാണ് ഗൗരവ് ഗൊഗോയ്. അസമിലെ ജോർഹട്ട് ലോക്സഭാ മണ്ഡലത്തിൽ നിന്നുള്ള പാർലമെന്റ് അംഗമാണ് അദ്ദേഹം. യുകെയിൽ ജനിച്ച എലിസബത്ത് കോൾബേണിനെ 2013 ൽ ഗൊഗോയ് വിവാഹം കഴിച്ചു. പരിസ്ഥിതി, കാലാവസ്ഥാ വ്യതിയാന വിഷയങ്ങളിൽ പ്രവർത്തിക്കുന്ന ബ്രിട്ടീഷ് വംശജയായ സാമൂഹിക പ്രവർത്തകയാണ് എലിസബത്ത്.
