ആലുവ: വെളിയത്ത്നാട് തന്ത്രവിദ്യാപീഠം സ്ഥാപകനും ആദ്ധ്യാത്മിക ആചാര്യനുമായിരുന്ന പി. മാധവ്ജിയുടെ ജന്മശതാബ്ദിയോടനുബന്ധിച്ച് നടത്തുന്ന ആഘോഷങ്ങള്ക്ക് ഇന്ന് തുടക്കം കുറിക്കും. നവം. നാല് വരെ നീളുന്ന പരിപാടികളില് രാജ്യത്തെ വിവിധ ഭാഗങ്ങളില് നിന്നുള്ള വേദപണ്ഡിതന്മാരും ആദ്ധ്യാത്മികാചാര്യന്മാരും ഭക്തജനങ്ങളും പങ്കെടുക്കും.
ഇന്ന് രാവിലെ കാലടി ആദിശങ്കര കീര്ത്തിസ്തംഭം മുതല് ശൃംഗേരി മഠം വരെ വേദഘോഷയാത്ര നടക്കും. തുടര്ന്ന് 11ന് വെളിയത്ത്നാട് തന്ത്രവിദ്യാപീഠത്തില് നടക്കുന്ന ഉദ്ഘാടന സമ്മേളനത്തില് തന്ത്രവിദ്യാപീഠം പ്രസിഡന്റ് മുല്ലപ്പള്ളി കൃഷ്ണന് നമ്പൂതിരി അദ്ധ്യക്ഷനാകും. കുളത്തൂര് അദ്വൈതാശ്രമ മഠാധിപതി സ്വാമി ചിദാനന്ദപുരി ഉദ്ഘാടനം ചെയ്യും. വിരുപാക്ഷ വി. ജഡിപാല് മുഖ്യാതിഥിയാകും. ഡോ. ഈശ്വരന് നമ്പൂതിരി, ശ്രീനിവാസന് പോറ്റി എന്നിവര് പ്രസംഗിക്കും. ഉച്ചയ്ക്ക് ശേഷം വിദ്വത് സദസുകള് നടക്കും. വൈകിട്ട് ഏഴിന് ‘കുചേലവൃത്തം’ കഥകളി അരങ്ങേറും.
നവംബര് ഒന്നിന് രാവിലെ 10.30 മുതല് വിദ്വത് സദസുകള് തുടങ്ങും. വൈകിട്ട് ആറിന് ഡോ. മാനസി രഘുനാഥ് അവതരിപ്പിക്കുന്ന ഒഡീസി- ഭരതനാട്യം. തുടര്ന്ന് നദീപൂജയും പൂര്ണ ആരതിയും. രണ്ടിന് രാവിലെ വിദ്വത് സദസുകള്ക്ക് തുടക്കം കുറിക്കും. ഉച്ചയ്ക്ക് 2ന് സമാപന സമ്മേളനത്തില് കാലടി സംസ്കൃത സര്വകലാശാല വൈസ് ചാന്സലര് പ്രൊഫ. കെ.കെ. ഗീതാകുമാരി അദ്ധ്യക്ഷയാകും. നടുവില് സ്വാമിയാര് മഠാധിപതി പാര്ത്ഥസാരഥി ഭാരതി സ്വാമികള് ഉദ്ഘാടനം ചെയ്യും. തൃശൂര് ബ്രഹ്മസ്വം മഠം വേദിക് റിസര്ച്ച് സെന്റര് ചെയര്മാന് ഡോ. സി.എം. നീലകണ്ഠന് മുഖ്യപ്രഭാഷണം നടത്തും. തുടര്ന്ന് ‘ശ്രീചക്ര നിരൂപണം (ശ്രീഭാഷ്യം)’ ഗ്രന്ഥ പ്രകാശനവും രാത്രി ഏഴിന് വീണക്കച്ചേരിയും. മൂന്നിന് തന്ത്രവിദ്യാപീഠം പരമാചാര്യനായിരുന്ന കല്പ്പുഴ ദിവാകരന് നമ്പൂതിരിപ്പാട് സ്മൃതിദിനം ആചരിക്കും. ആ ദിവസം അദ്ദേഹത്തിന്റെ ജന്മദിനവുമാണ്. സ്മൃതിദിനാഘോഷത്തോടനുബന്ധിച്ച് പുരസ്കാര സമര്പ്പണവും ആദ്ധ്യാത്മിക ചടങ്ങുകളും സംഘടിപ്പിച്ചിട്ടുണ്ട്.
