തിരുവനന്തപുരം: പിഎം ശ്രീ പദ്ധതിയില് വിദ്യാഭ്യാസ വകുപ്പ് കേന്ദ്രസര്ക്കാരുമായി ധാരണാപത്രം ഒപ്പിട്ടതിനു ശേഷം, പിന്മാറുമെന്ന തരത്തിലുള്ള പ്രചാരണം വസ്തുതാ വിരുദ്ധം. ഒപ്പിട്ട് പണം വാങ്ങിയാല് പിന്മാറാന് സംസ്ഥാന സര്ക്കാരുകള്ക്ക് സാധിക്കില്ലെന്ന് വിദഗ്ധര്. ധാരണാപത്രത്തില് ഇത് വ്യക്തമാക്കിയിട്ടുണ്ട്. കേരളത്തിന് ഏകപക്ഷീയമായി പിന്മാറാന് സാധിക്കില്ല. സംസ്ഥാന സര്ക്കാര് രൂപീകരിക്കുന്ന മന്ത്രിതല ഉപസമിതിക്കോ ഉദ്യോഗസ്ഥവൃന്ദത്തിനോ ഇതിനധികാരമില്ല. കേന്ദ്രസംസ്ഥാന സര്ക്കാരുകള് യോജിച്ചെടുക്കുന്ന തീരുമാനത്തിലൂടെ മാത്രമേ പദ്ധതി റദ്ദാക്കാനാവൂ. പദ്ധതി നടത്തിപ്പ് തൃപ്തികരമല്ലെങ്കില് 30 ദിവസത്തെ നോട്ടീസ് നല്കി ഒഴിവാക്കാനുള്ള അധികാരവും കേന്ദ്രത്തിനുണ്ട്.
എസ്എസ്കെ ഫണ്ടും പിഎം ശ്രീയും കൂട്ടിയോജിപ്പിച്ചതിനാല് പദ്ധതി നടപ്പാക്കിയില്ലെങ്കില് വിദ്യാഭ്യാസ മേഖലയ്ക്ക് കനത്ത തിരിച്ചടിയാകും. ഒരു ബ്ലോക്കില് രണ്ട് സ്കൂളുകളാണ് പദ്ധതിയിലേക്ക് തെരഞ്ഞെടുക്കുന്നത്. ഒരു സ്കൂളിന് ശരാശരി 1.13 കോടി രൂപയാണ് ലഭിക്കുക. കേന്ദ്ര-സംസ്ഥാന വിഹിതം 60-40 എന്ന അനുപാതത്തിലാണ്. പദ്ധതികള്ക്കാണ് ഫണ്ട് എന്നതിനാല് പദ്ധതി നടപ്പാക്കാതെ, പണം കിട്ടിയില്ലെന്ന പരാതിയുമായി കോടതിയെ സമീപിച്ചാലും തിരിച്ചടിയാകും.
സിപിഐ മന്ത്രിമാര് എതിര്ത്തതോടെ 2024 ഡിസംബറിലും പിന്നീട് 2025 ജൂണിലും പിഎം ശ്രീയില് ചേരുന്നില്ലെന്ന് സര്ക്കാര് തീരുമാനിച്ചിരുന്നതാണ്. ഇതിനിടക്കാണ് ഒപ്പുവച്ചത്. പദ്ധതി നടപ്പാക്കിയ സംസ്ഥാനങ്ങളുമായും കേന്ദ്രപ്രതിനിധികളുമായും തുടര് ചര്ച്ചകള് നടത്തിയിരുന്നെന്നും അതിന്റെ അടിസ്ഥാനത്തിലാണ് പദ്ധതിയില് ഒപ്പിടാനുള്ള തീരുമാനമെന്നും മന്ത്രി വി. ശിവന്കുട്ടിയും സ്ഥിരീകരിച്ചിരുന്നു. പദ്ധതിയില് ഒരു കുഴപ്പവുമില്ലെന്നും പദ്ധതിയെ എതിര്ക്കുന്ന പഴയ നിലപാട് താന് തിരുത്തിയെന്നും മന്ത്രി പറഞ്ഞു. എന്നാല് സിപിഐ പ്രതിഷേധം കനത്തതോടെ, തന്ത്രപരമായ തീരുമാനമാണിതെന്നും വിവിധ സ്കീമുകളിലായി തടഞ്ഞുവച്ചിരിക്കുന്ന 1500 കോടി രൂപയോളം നേടിയെടുക്കലാണ് ലക്ഷ്യമെന്നും അതുകഴിഞ്ഞാല് പദ്ധതി നടപ്പാക്കില്ലെന്നുമായിരുന്നു സിപിഎം നേതാക്കളുടെയും മന്ത്രിയുടെയും മറുപടി. ഫണ്ട് വാങ്ങിയ ശേഷം സംസ്ഥാനത്തിന് ഏകപക്ഷീയമായി പിന്മാറാനോ പദ്ധതി ഭാഗീകമായി പോലും നടപ്പാക്കാതിരിക്കാനോ സാധിക്കില്ല.
2020ല് നരേന്ദ്ര മോദി സര്ക്കാര് പ്രഖ്യാപിച്ച വിദ്യാഭ്യാസ നയത്തിന്റെ ഭാഗമായി 2022 സപ്തം. 7ന് അവതരിപ്പിച്ച പദ്ധതിയാണ് പ്രധാനമന്ത്രി സ്കൂള് ഫോര് റൈസിങ് ഇന്ത്യ അഥവാ പിഎം ശ്രീ. ഈ പദ്ധതിയില് പ്രവേശിക്കാന് സ്കൂളുകള്ക്ക് മാനദണ്ഡങ്ങള് ഏര്പ്പെടുത്തിയിരുന്നു. ഓരോ ബ്ലോക്കിലും രണ്ട് സ്കൂളുകളാണ് തെരഞ്ഞെടുക്കുന്നത്. നഗരപ്രദേശങ്ങളില് 70 ശതമാനവും ഗ്രാമപ്രദേശങ്ങളില് 60 ശതമാനവും സ്കോര് ലഭിച്ചാല് പദ്ധതിക്ക് അപേക്ഷിക്കാം. പിഎം ശ്രീയില് ചേരണമെങ്കില് വിദ്യാഭ്യാസ മന്ത്രാലയവുമായി ഒരു ധാരണാപത്രത്തില് ഒപ്പുവെക്കേണ്ടതുണ്ട്. സംസ്ഥാനം, കേന്ദ്രഭരണപ്രദേശം, കേന്ദ്രീയ വിദ്യാലയ സംഗതന്, നവോദയ വിദ്യാലയ സമിതി എന്നിവരാണ് ധാരണപത്രത്തില് ഒപ്പുവെക്കേണ്ടത്.
ജന്മഭൂമി ഓണ്ലൈന്