ആലപ്പുഴ: കേന്ദ്രസര്ക്കാര് അനുവദിച്ച നെല്ലുവില നല്കാതെ സംസ്ഥാന സര്ക്കാരിന്റെ സംഭരണ വില വര്ദ്ധനവ് പ്രഖ്യാപനം. 28.20 രൂപയില് നിന്ന് 30 രൂപയാക്കിയാണ് പ്രഖ്യാപനം. തെരഞ്ഞെടുപ്പ് മുന്നില്ക്കണ്ടാണ് വര്ദ്ധനവ്. നിലവില് ഒരു കിലോഗ്രാം നെല്ലിന് കേന്ദ്ര താങ്ങുവിലയായ 23.69 രൂപയോടൊപ്പം സംസ്ഥാന പ്രോത്സാഹനവിഹിതമായ 4.51 രൂപയും ചേര്ത്ത് 28.20 രൂപക്കാണ് സംഭരിച്ചിരുന്നത്.
2021 മുതല് സംസ്ഥാന സര്ക്കാര് പ്രോത്സാഹന വിഹിതത്തില് വെട്ടിക്കുറച്ച 4.09 രൂപ പുനഃസ്ഥാപിച്ചാല് സംഭരണവില 32.29 രൂപയാകും. 12 പൈസ കൈകാര്യച്ചെലവായി അനുവദിക്കുന്നതും ചേര്ത്താല് 32.41 രൂപ കര്ഷകര്ക്ക് ലഭിക്കണം. ഈ സാഹചര്യത്തിലാണ് നെല്ല് സംഭരണവില 30 രൂപയായി വര്ദ്ധിപ്പിച്ചത് കൊട്ടിഘോഷിക്കുന്നത്.
2021 മുതല് സംസ്ഥാന സര്ക്കാര് വെട്ടിക്കുറച്ചുകൊണ്ടിരിക്കുന്ന പ്രോത്സാഹനവിഹിതത്തില് വര്ധനവരുത്താതെയാണ് നെല്കര്ഷകരെ സംസ്ഥാന സര്ക്കാര് ദ്രോഹിച്ചത്. 2021ല് ഇത് കിലോഗ്രാമിന് 8.60 രൂപയായിരുന്നു സംസ്ഥാന സര്ക്കാര് വിഹിതം. അടുത്തവര്ഷം കേന്ദ്ര താങ്ങുവില 20.40 രൂപയാക്കിയപ്പോള്, 7.80 രൂപയായി സംസ്ഥാനവിഹിതം കുറച്ചു. 2023ല് കേന്ദ്രസര്ക്കാര് താങ്ങുവില കിലോഗ്രാമിന് 1.48 രൂപ കൂട്ടി 21.83 ആക്കിയപ്പോള് സംസ്ഥാനം പ്രോത്സാഹന വിഹിതത്തില് അത്രയും തുക കുറവുചെയ്ത്, 6.37 രൂപയായി നിശ്ചയിച്ചു. കഴിഞ്ഞവര്ഷം കേന്ദ്രം 23 രൂപയാക്കിയപ്പോള് സംസ്ഥാനത്ത് സംഭരണ വില ഉയര്ത്താതെ പ്രോത്സാഹനവിഹിതം 5.20 രൂപയായി കുറയ്ക്കുകയായിരുന്നു.
