ഗോവ: ഇന്ത്യന് സൂപ്പര് കപ്പ് ഫുട്ബോളില് കേരള ബ്ലാസ്റ്റേഴ്സ് ഇന്ന് ആദ്യ മത്സരത്തിന്. എതിരാളികള് രാജസ്ഥാന് യുണൈറ്റഡ്. ബാംബോളിമിലെ ജി.എം.സി. അത്ലറ്റിക് സ്റ്റേഡിയത്തില് വൈകീട്ട് 4:30നാണ് മത്സരം.
ഇരു ടീമുകളും ആദ്യമായാണ് നേര്ക്കുനേര് വരുന്നത്. ഗ്രൂപ്പ് ഡിയില് ഉള്പ്പെട്ട ടീമുകള് ജയത്തോടെ തുടക്കം കുറിക്കാന് ഒരുങ്ങിക്കഴിഞ്ഞു. പുതിയ വിദേശ സൈനിങ്ങുകളും ഭാരത യുവതാരങ്ങളെയും ഉള്പ്പെടുത്തി പരിഷ്കരിച്ച സ്ക്വാഡുമായാണ് ബ്ലാസ്റ്റേഴ്സ് ഗോവയില് എത്തിയിരിക്കുന്നത്. മുഖ്യ പരിശീലകന് ഡേവിഡ് കാറ്റലയുടെ നേതൃത്വത്തിലാണ് ബ്ലാസ്റ്റേഴ്സിന്റെ തയ്യാറെടുപ്പുകള്. ടീം സജ്ജമാണ്, എല്ലാവരും നന്നായി തയ്യാറെടുത്തു കൊണ്ടിരിക്കുന്നു. ആദ്യ മത്സരങ്ങള് എളുപ്പമാകില്ല. രാജസ്ഥാന് യുണൈറ്റഡ് പ്രതിരോധത്തില് കെട്ടുറപ്പുള്ളവരാണ്, അത് ശ്രദ്ധിക്കണം. ഞങ്ങളുടെ പ്രകടനം നൂറ് ശതമാനമായാല് വിജയം നേടാന് കഴിയുമെന്നാണ് പ്രതീക്ഷ- കറ്റാല പറഞ്ഞു.
വാര്ത്താ സമ്മേളനത്തില് നായകന് അഡ്രിയാന് ലൂണയും ഉണ്ടായിരുന്നു. ഈ ടൂര്ണമെന്റില് തുടക്കത്തില്ത്തന്നെ മൂന്ന് പോയിന്റുകള് നേടുക എന്നതാണ് ലക്ഷ്യം, സാഹചര്യങ്ങളുമായി പൊരുത്തപ്പെട്ട് ആക്രമണ ഫുട്ബോള് കളിക്കാനാണ് ശ്രമം, ടീമിലുള്ള വിശ്വാസവും വിജയിക്കാനുള്ള മനോഭാവവും പ്രധാനമാണ്- ലൂണ പറഞ്ഞു.
ഗ്രൂപ്പ് ഡി-യില് എസ്.സി ദല്ഹി, മുംബൈ സിറ്റി എഫ്സി എന്നിവരാണ് ബ്ലാസ്റ്റേഴ്സിന്റെ മറ്റ് എതിരാളികള്. ഗോവയിലെ ബാംബോളിമിലെ ജിഎംസി, മഢ്ഗാവിലെ ഫറ്റോര്ഡ സ്റ്റേഡിയം എന്നിവയാണ് വേദികള്.
