ന്യൂദല്ഹി: ക്രിമിനല് കേസുകള് വര്ഷങ്ങള് വൈകുകയും ഇഴഞ്ഞുനീങ്ങുകയും ചെയ്യുന്നത് തടയാന് സുപ്രീംകോടതി നടപടി തുടങ്ങി. വിചാരണക്കോടതികളില് കുറ്റപത്രങ്ങള് സമര്പ്പിക്കുന്നതിനും വിചാരണ തുടങ്ങുന്നതിനും മറ്റും രാജ്യമൊട്ടാകെ സമയക്രമം നിശ്ചിയിക്കുമെന്ന് സുപ്രീം കോടതി സൂചിപ്പിച്ചു. ഇക്കാര്യത്തില് കോടതിയെ സഹായിക്കാന് മുതിര്ന്ന അഭിഭാഷകനായ സിദ്ധാര്ത്ഥ് ലൂത്രയെ അമിക്കസ് ക്യൂറിയായും നിയമിച്ചു.
ജസ്റ്റിസുമാരായ അരവിന്ദ്കുമാര്, എന്.വി. അന്ജാരിയ എന്നിവരടങ്ങിയ ഡിവിഷന് ബെഞ്ചിന്റേതാണ് നടപടി. ബീഹാറിലെ ഒരു കവര്ച്ചക്കേസിലെ പ്രതി സമര്പ്പിച്ച ജാമ്യാപേക്ഷ പരിഗണിക്കവേയാണ് കോടതി വിചാരണ തീര്ത്ത് കേസുകളില് വിധി പറയാന് സമയക്രമം നിശ്ചിയിക്കുമെന്ന് സൂചിപ്പിച്ചത്. കുറ്റപത്രം സമര്പ്പിക്കാന് മൂന്നും നാലും വര്ഷമെടുക്കുന്നു, എന്താണിത്? കുറ്റപത്രം ഫയല് ചെയ്താലുടന് വിചാരണ തുടങ്ങണം. ഇക്കാര്യത്തില് ദേശീയതലത്തില് മാര്ഗ നിര്ദേശം നല്കേണ്ടിവരും. ഇക്കാര്യത്തില് അറ്റോര്ണി ജനറലിനോടും നിലപാട് ആരാഞ്ഞു.
