തിരുവനന്തപുരം: വോട്ടര് പട്ടികയുടെ പ്രത്യേക തീവ്ര പുതുക്കല് (എസ്ഐആര്) സംസ്ഥാനത്തു നടപ്പാക്കുന്നതുമായി ബന്ധപ്പെട്ട് അംഗീകൃത രാഷ്ട്രീയപാര്ട്ടികളുടെ യോഗം തിരുവനന്തപുരത്ത് നടന്നു. മുഖ്യ തെരഞ്ഞെടുപ്പ് ഓഫീസര് ഡോ. രത്തന് യു കേല്ക്കറുടെ അധ്യക്ഷതയില് നടന്ന യോഗത്തില് പദ്ധതി നടത്തിപ്പുമായി ബന്ധപ്പെട്ട് വിവിധ പാര്ട്ടികളുടെ സംശയനിവാരണവും തുടര്ന്ന് മാധ്യമ പ്രവര്ത്തകരുമായുള്ള ആശയവിനിമയവും നടന്നു.
പ്രത്യേക തീവ്ര പുതുക്കല് പദ്ധതിയുടെ പരിശീലന പ്രവര്ത്തനങ്ങള് നവംബര് മൂന്നാം തീയതി വരെ തുടരും. വീട് വീടാന്തരമുള്ള വിവര ശേഖരണ ഘട്ടം നവംബര് നാലു മുതല് ഡിസംബര് നാലു വരെ നടക്കും. പ്രാഥമിക വോട്ടര്പ്പട്ടിക ഡിസംബര് ഒന്പതിനു പ്രസിദ്ധീകരിക്കും. ഇതിന്മേലുള്ള ഹിയറിങ്ങും പരിശോധനയും ഡിസംബര് ഒന്പതു മുതല് 2026 ജനുവരി 31 വരെ നടക്കും. അന്തിമ വോട്ടര്പ്പട്ടിക 2026 ഫെബ്രുവരി 7 ന് പ്രസിദ്ധീകരിക്കും.
ഈ വര്ഷം ഒക്ടോബര് 27 ന് നിലവിലുണ്ടായിരുന്ന വോട്ടര്പ്പട്ടിക പ്രകാരമുള്ള എല്ലാ വോട്ടര്മാര്ക്കും എനുമെറേഷന് ഫോം കൈമാറും. പദ്ധതിയുടെ സുഗമമായ നടത്തിപ്പിനായി രാഷ്ട്രീയപ്പാര്ട്ടികളുടെ സജീവ പങ്കാളിത്തവും ബൂത്ത് ലെവല് ഏജന്റുമാരുടെ നിയമനവും മുഖ്യ തെരഞ്ഞെടുപ്പ് ഓഫീസര് ആവശ്യപ്പെട്ടു. പദ്ധതി നടത്തിപ്പിന്റെ പുരോഗതി വിലയിരുത്താനായി ആഴ്ചതോറും അംഗീകൃത രാഷ്ട്രീയപ്പാര്ട്ടികളുടെ യോഗം നടത്തുമെന്നും ഡോ. രത്തന് യു കേല്ക്കല് അറിയിച്ചു.
അഡ്വ എസ് സുരേഷ് (ഭാരതീയ ജനതാ പാര്ട്ടി), എം വി ജയരാജന് (കമ്മ്യൂണിസ്റ്റ് പാര്ട്ടി ഓഫ് ഇന്ത്യ മാര്ക്സിസ്റ്റ്) സണ്ണി ജോസഫ് എം എല് എ, പി സി വിഷ്ണുനാഥ് എം എല് എ, എം ലിജു (ഇന്ത്യന് നാഷണല് കോണ്ഗ്രസ്), സത്യന് മൊകേരി (കമ്മ്യൂണിസ്റ്റ് പാര്ട്ടി ഓഫ് ഇന്ത്യ), സി. പി. ചെറിയ മുഹമ്മദ് (ഇന്ത്യന് യൂണിയന് മുസ്ലിം ലീഗ്), ജോയ് എബ്രഹാം (കേരള കോണ്ഗ്രസ്), ഡോ സ്റ്റീഫന് ജോര്ജ് കെ സി (കേരള കോണ്ഗ്രസ്. എം) പി ജി പ്രസന്ന കുമാര്, കെ എസ് സനല് കുമാര് (റെവോലൂഷണറി സോഷ്യലിസ്റ്റ് പാര്ട്ടി) എന്നിവര് യോഗത്തില് പങ്കെടുത്തു.
