കോഴിക്കോട് : താമരശേരിയിലെ ഫ്രഷ്കട്ട് സംഘര്ഷത്തില് രണ്ടു പേര് കൂടി പിടിയിലായി. താമരശേരി അമ്പലമുക്ക് കൈപ്പക്കമണ്ണില് ഷൗക്കത്ത് (33), കൂടത്തായി വട്ടച്ചന്കണ്ടി വി കെ മുഹമ്മദ് അഷറഫ് (42) എന്നിവരെയാണ് പൊലീസ് കസ്റ്റഡിയിലെടുത്തത്.
ഇതോടെ കേസില് പിടിയില് ആയവരുടെ എണ്ണം 12 ആയി.അറവുമാലിന്യ സംസ്കരണ കേന്ദ്രമായ താമരശേരി ഫ്രഷ് കട്ടില് ഉണ്ടായ സംഘര്ഷത്തില് അന്വേഷണം തുടരുകയാണ്. ഒളിവില് പോയവരെ കണ്ടെത്താന് പൊലീസ് പരിശോധന തുടരുന്നു. അതേസമയം,സംഘര്ഷത്തിലും പൊലീസ് പരിശോധനയിലും വിദ്യാര്ഥികള് ഭീതിയിലാണെന്നും കൗണ്സിലിംഗ് നല്കേണ്ട അവസ്ഥയാണെന്നും രക്ഷിതാക്കളും അധ്യാപകരും പറയുന്നു. അറുപതോളം വിദ്യാര്ഥികള് പഠിക്കുന്ന ഇരൂട് സെന്റ് ജോസഫ് എല് പി സ്കൂളില് രണ്ട് ദിവസമായി കുറച്ച് വിദ്യാര്ഥികള് മാത്രമാണ് എത്തുന്നത്.
അതിനിടെ ഈ വാര്ത്തയ്ക്ക് പിന്നാലെ സംസ്ഥാന മനുഷ്യാവകാശ കമ്മീഷന് ആക്രമ സംഭവങ്ങളെക്കുറിച്ചും കുട്ടികള്ക്ക് സ്കൂളില് പോകാന് കഴിയാത്ത സാഹചര്യത്തെക്കുറിച്ചും റിപ്പോര്ട്ട് തേടി .കോഴിക്കോട് ജില്ലാ കലളക്ടര് രണ്ട് ആഴ്ചയ്ക്കകം റിപ്പോര്ട്ട് സമര്പ്പിക്കണം.
കഴിഞ്ഞ 21നാണ് താമരശേരി ഫ്രഷ് കട്ടില് സംഘര്ഷം ഉണ്ടായത്. മാലിന്യ സംസ്കരണ കേന്ദ്രത്തിനെതിരായ നാട്ടുകാരുടെ പ്രതിഷേധത്തെ തുടര്ന്നായിരുന്നു സംഘര്ഷം.
