ന്യൂദല്ഹി: ടാറ്റയുടെ ആയുധങ്ങള് ബഹിഷ്കരിക്കണമെന്ന പ്രചാരണവുമായി തുര്ക്കിയുടെ സര്ക്കാര് മാധ്യമമായ ടിആര്ടി വേള്ഡ്. ഗാസയില് ഇസ്രയേല് നടത്തുന്ന സൈനിക നടപടികളില് ടാറ്റയ്ക്കും പങ്കുണ്ടെന്നാണ് ടിആര്ടി വേള്ഡ് ആരോപിക്കുന്നത്. ഇന്ത്യ-ഇസ്രയേല് കൂട്ടുമുന്നണിയ്ക്ക് പിന്നില് പ്രവര്ത്തിക്കുന്ന പ്രധാന ശക്തി ടാറ്റയാണെന്നും ടിആര്ടി വേള്ഡില് പ്രസിദ്ധീകരിച്ച ലേഖനത്തില് ആരോപിക്കുന്നു.
തുര്ക്കിയുടെ കള്ളത്തരം
നേരത്തെ ഇസ്രയേലിന് ആയുധങ്ങള് അയച്ചുകൊടുത്തതിന്റെ പേരില് ഐക്യരാഷ്ട്രസഭയുടെ വിമര്ശനം ഏറ്റുവാങ്ങിയ തുര്ക്കിയാണ് ഇപ്പോള് ടാറ്റയ്ക്കെതിരെ ആരോപണമുയര്ത്തുന്നത് എന്നത് വിചിത്രമാണ്.
അമേരിക്ക നിര്മ്മിച്ച എഫ് 35 എന്ന യുദ്ധവിമാനമാണ് അന്ന് ഇസ്രയേലിനെ സഹായിക്കാന് തുര്ക്കി അയച്ചുകൊടുത്തത് എന്നതിന് യുഎന്നിന്റെ പക്കല് തെളിവുണ്ട്. ഇപ്പോള് ടാറ്റയ്ക്കെതിരെ പ്രചാരണം നടത്തുക വഴി മോദി സര്ക്കാരിനെ ദുര്ബലപ്പെടുത്താനാണ് തുര്ക്കിയുടെ ശ്രമം. പലസ്തീന്റെ വക്താക്കളായി നടിക്കുന്ന തുര്ക്കി പക്ഷെ ഗാസയില് ബോംബാക്രമണം തുടരാന് കൂട്ടുനിന്നവരാണെന്ന് ഐക്യരാഷ്ട്രസമിതിയുടെ പാനല് കുറ്റപ്പെടുത്തിയിട്ടുള്ളതാണ്. അങ്ങിനെയുള്ളവരാണ് ടാറ്റയെ ഇസ്രയേലിന് പിന്തുണ നല്കുന്നവരെന്ന പേരില് വിമര്ശനം ഉയര്ത്തുന്നത്.
ആഗോളതലത്തില് വളരാന് ശ്രമിക്കുന്ന ടാറ്റയെ തകര്ക്കാനുള്ള അന്താരാഷ്ട്രഗൂഢാലോചനയുടെ ഭാഗം കൂടിയാണ് ഈ പ്രചാരണം എന്ന് കരുതുന്നു.സൗത്ത് ഏഷ്യ ലെഫ്റ്റ് (സലാം) എന്ന ന്യൂയോര്ക്ക് കേന്ദ്രമായി പ്രവര്ത്തിക്കുന്ന ഇടത് സംഘടനയും ‘ടാറ്റാ ബൈബൈ എന്ന പേരില് 50 പേജുള്ള ഒരു റിപ്പോര്ട്ട് ടാറ്റയ്ക്കെതിരെ പ്രസിദ്ധീകരിച്ചിരുന്നു. എക്സ് ഉള്പ്പെടെയുള്ള സമൂഹമാധ്യമങ്ങളില് വലിയ സ്വാധീനമുള്ള സംഘടനയാണ് സലാം. കേരളത്തിലെ ഇസ്ലാമിക ഗ്രൂപ്പുകളില് ചിലത് ടാറ്റയുടെ സൂഡിയോ ഷോറൂമുകള് ബഹിഷ്കരിക്കാന് ആഹ്വാനം ചെയ്തത് ഇതിന്റെ തുടര്ച്ചയായിരിക്കാം എന്ന് കരുതുന്നു.
ഇസ്രയേലിന് വേണ്ടി എവിയോണിക്സ് ഘടകങ്ങള് മുതല് ഐടി അടിസ്ഥാനസൗകര്യവികസനങ്ങള് വരെ ടാറ്റയുടെ ടിസിഎസ് എന്ന കമ്പനി ചെയ്തുകൊടുക്കുന്നു എന്നും സലാം ആരോപിക്കുന്നു. പക്ഷെ ടിസിഎസ് അവരുടെ ബിസിനസ് വളര്ച്ചയുടെ ഭാഗമായി മാത്രമാണ് ലോകത്തിലെ ഏത് ഓര്ഡറുകളും നടപ്പാക്കുന്നത് എന്ന കാര്യം ഇവര് മറക്കുന്നു.
പ്രതിരോധരംഗത്തെ ആയുധങ്ങളും ഉപകരണങ്ങളും നിര്മ്മിക്കുന്ന അഡ്വാന്സ് ഡ് സിസ്റ്റം എന്ന ടാറ്റയുടെ കമ്പനി ഇസ്രയേലിലെ ചില പ്രതിരോധക്കമ്പനികളുമായി സഹകരിച്ച് പ്രവര്ത്തിക്കുന്നുണ്ട്. ഇത് ചൂണ്ടിക്കാട്ടിയാണ് ടാറ്റയുടെ ആയുധങ്ങള് ഉള്പ്പെടെ ബഹിഷ്കരിക്കണമെന്ന ആഹ്വാനം തുര്ക്കി സര്ക്കാര് മാധ്യമമായ ടിആര്ടി ഉയര്ത്തുന്നത്. റഫാല് കമ്പനി പോലെ ടാറ്റയും പ്രതിരോധരംഗത്ത് ഒരു വലിയ കമ്പനിയായി വളരാന് ശ്രമിക്കുകയാണ്. അതിന്റെ ഭാഗമായാണ് ആധുനികമായ കാര്യങ്ങള് അറിയാന് ഇസ്രയേലുമായി സഹകരിച്ച് ഗവേഷണവും വികസനവും നടത്തുന്നത്. ടാറ്റയുടെ ലക്ഷ്യം ബിസിനസ് മാത്രമാണ് എന്ന കാര്യവും അമിതമായ ഇസ്രയേല് വെറുപ്പ് കാരണം ഇത്തരം സംഘടനകള് കാണാതെ പോകുന്നു.
