ബെംഗളൂരു ; പൊതുസ്ഥലങ്ങളിലെ ആർഎസ്എസ് പ്രവർത്തനങ്ങൾ റദ്ദാക്കണമെന്ന് മന്ത്രി പ്രിയങ്ക് ഖാർഗെ മുഖ്യമന്ത്രി സിദ്ധരാമയ്യയ്ക്ക് കത്തെഴുതിയത് ദിവസങ്ങൾക്ക് മുൻപാണ്. അതിനു പിന്നാലെ ഇതുമായി ബന്ധപ്പെട്ട് ബിൽ കൊണ്ടുവരാനും ഖാർഗെ ശ്രമിച്ചിരുന്നു. എന്നാൽ മുഖ്യമന്ത്രി സിദ്ധരാമയ്യ തന്നെ ഇതിനെ എതിർത്തുവെന്നായിരുന്നു റിപ്പോർട്ടുകൾ . ഇപ്പോഴിതാ ആർ എസ് എസ് പ്രവർത്തകന് സുപ്രധാന പദവി നൽകി ഓർഡർ ഇറക്കിയിരിക്കുകയാണ് സിദ്ധരാമയ്യ .
തിപ്തൂരിൽ നിന്നുള്ള ആർഎസ്എസ് അംഗമായ ഡോ. ശ്രീധർ കുമാറിനെയാണ് യശസ്വിനി സഹകരണ അംഗങ്ങളുടെ ആരോഗ്യ സംരക്ഷണ ട്രസ്റ്റിലെ അംഗമായി സർക്കാർ നിയമിച്ചത് . കെ.എൻ. രാജണ്ണയുടെ രാജിക്ക് ശേഷം, സഹകരണ വകുപ്പ് മുഖ്യമന്ത്രി സിദ്ധരാമയ്യയാണ് കൈകാര്യം ചെയ്യുന്നത്.
ട്രസ്റ്റിന്റെ രക്ഷാധികാരിയും മുഖ്യമന്ത്രി സിദ്ധരാമയ്യ തന്നെ. ഇത് ഇപ്പോൾ കോൺഗ്രസ് പ്രവർത്തകരുടെ രോഷത്തിന് കാരണമായിട്ടുണ്ട്. എങ്കിലും സിദ്ധരാമയ്യയുടെ ഈ മനം മാറ്റത്തിന്റെ കാരണം മാത്രം വ്യക്തമായിട്ടില്ല. പ്രിയങ്ക് ഖാർഗെയും ഇക്കാര്യത്തിൽ അതൃപ്തി അറിയിച്ചതായാണ് റിപ്പോർട്ട്.
