ആലപ്പുഴ: ശബരിമല സ്വര്ണക്കൊള്ളയില് ഇടതുസര്ക്കാരും, ഇടതുപക്ഷക്കാരായ ദേവസ്വം ബോര്ഡ് പ്രസിഡന്റും അംഗങ്ങളും പ്രതിക്കൂട്ടിലായ സാഹചര്യത്തില് കോണ്ഗ്രസ് നേതാക്കള് ദേവസ്വം ബോര്ഡ് ക്ഷേത്രങ്ങള് കൊള്ളയടിച്ച വിവരങ്ങളും പുറത്തുവരുന്നു. തിരുവിതാംകൂര് ദേവസ്വം ബോര്ഡിന്റെ കീഴിലുള്ള മേജര് ക്ഷേത്രങ്ങളില് ഒന്നാണ് ആലപ്പുഴ തുറവൂരിലെ നരസിംഹസ്വാമി ക്ഷേത്രം.
1992 മുതല് 2019 വരെ ഈ ക്ഷേത്രം അടക്കിഭരിച്ചത് ജില്ലയിലെ പ്രമുഖ കോണ്ഗ്രസ് നേതാവും ഇപ്പോള് കെപിസിസി മെമ്പറുമായ ടി.ജി. പദ്മനാഭന് നായരുടെ നേതൃത്വത്തിലാണ്. നിരവധി ആക്ഷേപങ്ങളാണ് ഇയാള്ക്കെതിരെ ഉയര്ന്നത്. എന്നിട്ടും പ്രമുഖ കോണ്ഗ്രസ് നേതാക്കള് ഇയാളെ സംരക്ഷിക്കുകയാണ്. 1992ല് ഇയാള് പ്രസിഡന്റായി തുറവൂര് മഹാക്ഷേത്ര ഭക്തജനസമിതി എന്ന സംഘടന രൂപീകരിക്കുകയും അന്നത്തെ ദേവസ്വം ബോര്ഡ് ഉന്നതരുടെ ഒത്താശയോടെ ക്ഷേത്രഭരണം കൈയാളുകയുമായിരുന്നു. തുടര്ന്ന് നടന്ന അഴിമതിയും ക്രമക്കേടുകളും സംസ്ഥാന ഓഡിറ്റ് വകുപ്പിന്റെ റിപ്പോര്ട്ടിലും, ദേവസ്വം വിജിലന്സിന്റെ റിപ്പോര്ട്ടിലും വ്യക്തമാണ്. 2013 മുതല് 2018 വരെയുള്ള ഓഡിറ്റ് റിപ്പോര്ട്ടില് ലക്ഷങ്ങളുടെ വെട്ടിപ്പ് ആണ് കണ്ടെത്തിയിട്ടുള്ളത്. കാലാകാലങ്ങളിലെ ദേവസ്വം ബോര്ഡ് ഉദ്യോഗസ്ഥരും സംസ്ഥാന കോണ്ഗ്രസ് നേതൃത്വവും അറിഞ്ഞുകൊണ്ടാണ് ഈ കൊള്ള നടന്നത്. അതിന്റെ പ്രകടമായ ഉദാഹരണമാണ് ഇയാള് കെപിസിസി അംഗമായി തുടരുന്നത്.
2011ലെ യുഡിഎഫ് ഭരണകാലത്ത് ഇയാള് തിരുവിതാംകൂര് ദേവസ്വം ബോര്ഡ് പ്രസിഡന്റാവാന് ശ്രമം നടത്തി. കിട്ടാതെ വന്നപ്പോള് ഉമ്മന്ചാണ്ടിയുമായി തെറ്റിപ്പിരിഞ്ഞ് കെ.സി. വേണുഗോപാല് പക്ഷത്തേക്ക് മാറി. ദേവസ്വം ബോര്ഡിന്റെ രസീതുകള്ക്ക് സമാന്തരമായി വഴിപാട് രസീതുകള് അടിച്ച് ലക്ഷങ്ങള് തട്ടിയെടുത്തതും അന്നദാനത്തിന്റെ പേരില് ലക്ഷങ്ങള് തട്ടിയതും ഉത്സവത്തിന് തറ ലേലം ചെയ്തതിലൂടെ ലക്ഷങ്ങള് തട്ടിയതും ഓഡിറ്റ് റിപ്പോര്ട്ടില് എടുത്തുപറയുന്നുണ്ട്. ദേവസ്വം വിജിലന്സ് റിപ്പോര്ട്ടിലും ഗുരുതരമായ കണ്ടെത്തലുകള് ഉണ്ട്.
ഹൈക്കോടതിയിലെ പല ജഡ്ജിമാരുടേയും പേര് പറഞ്ഞ് ഭീഷണിപ്പെടുത്തി ദേവസ്വം ബോര്ഡ് ഉദ്യോഗസ്ഥരെക്കൊണ്ട് തന്റെ താല്പര്യമനുസരിച്ച് ഇയാള് പ്രവര്ത്തിപ്പിച്ചു എന്ന് റിപ്പോര്ട്ടില് പറയുന്നു. ശബരിമല എക്സി. ഓഫീസര് സ്ഥാനം വാഗ്ദാനം
ചെയ്തതിനാല് അക്കാലയളവിലെ വൈക്കം ഡെ. കമ്മിഷണര് ഇതിനെല്ലാം ഒത്താശ ചെയ്തു. ജില്ലയില് നിന്നുള്ള പ്രമുഖ കോണ്ഗ്രസ് നേതാക്കള്ക്കെല്ലാം ഇയാള് കറവപ്പശുവായിരുന്നു.
വൃദ്ധസദനം പണിയാനെന്ന പേരില് സര്ക്കാരില് നിന്ന് ഇയാള് ഒരു കോടി രൂപ ഗ്രാന്റായി വാങ്ങിയെങ്കിലും വൃദ്ധസദനം ഇതുവരെ യാഥാര്ത്ഥ്യമായില്ല. ഉത്സവത്തിന്റെ പേരില് വിവിധ വര്ഷങ്ങളിലായി സംസ്ഥാന സര്ക്കാരിന്റെ ടൂറിസം വകുപ്പില് നിന്നും ഇരുപത് ലക്ഷത്തോളം രൂപ കൈപ്പറ്റി. ഈ പണം ക്ഷേത്രത്തിന്റെ കണക്കിലുമില്ല, ഉത്സവത്തിന്റെ കണക്കിലുമില്ല.
