കൊച്ചി: റാപ്പര് വേടനെതിരെ പരാതി നല്കിയ യുവതിയെ എറണാകുളം സെന്ട്രല് പോലീസ് സ്റ്റേഷനില് വിളിച്ചുവരുത്താനുള്ള പൊലീസിന്റെ നീക്കം കോടതിയില് പൊളിഞ്ഞു. നോട്ടീസിനെതിരെ പരാതിക്കാരി ഹൈക്കോടതിയില് സമര്പ്പിച്ച ഹര്ജിയെത്തുടര്ന്നാണ് മൊഴി നല്കാന് ഹാജരാകണമെന്ന് ആവശ്യപ്പെട്ടുള്ള നോട്ടീസ് പൊലീസ് പിന്വലിച്ചത്. ഇക്കാര്യം പബ്ലിക് പ്രോസിക്യൂട്ടര് അറിയിച്ചതിനെത്തുടര്ന്ന് ജസ്റ്റിസ് സി പ്രദീപ് കുമാര് യുവതിയുടെ ഹര്ജി തീര്പ്പാക്കി. വിവാഹ വാഗ്ദാനം നല്കി ബലാത്സംഗം ചെയ്തതായി റാപ്പര് വേടനെതിരെ പരാതി നല്കിയതോടെ തന്റെ സ്വകാര്യവിവരങ്ങള് ദൃശ്യമാധ്യമങ്ങള് പുറത്തുവിട്ടുവെന്ന് ഹര്ജിക്കാരി ചൂണ്ടിക്കാട്ടി. ഇത് വലിയ സൈബര് ആക്രമണങ്ങള്ക്ക് കാരണമായി.
മൊഴി രേഖപ്പെടുത്തുന്നതിനായി പോലീസിന് മുന്നില് ഹാജരായാല് തന്നെ തിരിച്ചറിയുമെന്ന് ആശങ്കയുണ്ടെന്ന് ഹര്ജിക്കാരി പറഞ്ഞു. ഇരകളുടെ അന്തസ്സ്, സ്വകാര്യത, വൈകാരിക ക്ഷേമം എന്നിവ സംരക്ഷിക്കുന്നതിനായി ഇരകളുടെ ഐഡന്റിറ്റി വെളിപ്പെടുത്തുന്നത് ഭാരതീയ ന്യായ സംഹിത, 2023 സെക്ഷന് 72(1) വിലക്കുന്നുണ്ടെന്നും ഇരയുടെ ക്ഷേമത്തിന് മുന്ഗണന നല്കേണ്ടതിന്റെ ആവശ്യകത ഊന്നിപ്പറയുന്നുണ്ടെന്നും ഹര്ജിയില് ചൂണ്ടിക്കാട്ടി. ഇതോടെയാണ് നോട്ടീസ് പിന്വലിച്ചതായി പ്രോസിക്യൂട്ടര് കോടതിയെ അറിയിച്ചത്. ഇതേത്തുടര്ന്ന് കോടതി ഹര്ജി അവസാനിപ്പിച്ചു.
വേടനെതിരെ പരാതി നല്കിയ യുവതിയെ വിളിച്ചുവരുത്താനുള്ള പൊലീസിന്റെ നീക്കം കോടതിയില് പൊളിഞ്ഞു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.