നല്ലതിനെ എതിർക്കുന്നത് സിപിഎം പാരമ്പര്യമെന്ന് വി. മുരളീധരൻ

തിരുവനന്തപുരം: കേരള സർക്കാർ പിഎം ശ്രീ പദ്ധതിയെ എതിർക്കുന്നതിൽ യാതൊരു അടിസ്ഥാനവുമില്ലെന്ന് മുൻ കേന്ദ്രമന്ത്രി വി. മുരളീധരൻ. ഏതൊരു നല്ല പദ്ധതിയെയും ആദ്യം എതിർക്കുന്നതാണ് സിപിഎമ്മിന്റെ പാരമ്പര്യം. കേരളത്തിൽ ജനിച്ചതിന്റെ പേരിൽ കുഞ്ഞുങ്ങൾക്ക് മികച്ച ഭാവി നിഷേധിക്കരുത്. സംസ്ഥാനത്ത് ദേശീയവിദ്യാഭ്യാസപദ്ധതി നടപ്പാക്കുമെന്ന് പിണറായി സർക്കാർ ഉറച്ച് പറയണമെന്നും വി.മുരളീധരൻ പറഞ്ഞു. എൽഡിഎഫിന്റെ പൊള്ളയായ പ്രത്യയശാസ്ത്ര തള്ളുകൾ ജനങ്ങൾ തിരിച്ചറിയുന്നുണ്ട്. കുടിവെള്ളം മുതൽ വിദ്യാഭ്യാസം വരെ കേരളം നിവർന്നുനിൽക്കുന്നത് കേന്ദ്രഫണ്ടിലെന്നത് യാഥാർഥ്യമാണ്. രാജ്യം കുതിപ്പിലേക്ക് നീങ്ങുമ്പോൾ അവസരവാദവും ഇരട്ടത്താപ്പും ഒഴിവാക്കി അതിനൊപ്പം നിൽക്കാൻ പഠിക്കണമെന്നും അദ്ദേഹം പറഞ്ഞു.