ന്യൂദല്ഹി: ദീപാവലി, ഛഠ് പൂജ ആഘോഷങ്ങളുടെ ഭാഗമായുള്ള പ്രത്യേക ട്രെയിനുകളില് ഇതുവരെ ഒരു കോടിയിലധികം പേര് യാത്ര ചെയ്തതായി കേന്ദ്ര റെയില്വേ മന്ത്രി അശ്വിനി വൈഷ്ണവ്. യാത്രക്കാര് സുരക്ഷിതമായി ലക്ഷ്യസ്ഥാനങ്ങളില് എത്തുന്നുണ്ടെന്ന് ഉറപ്പാക്കാന് 12 ലക്ഷം റെയില്വേ ജീവനക്കാര് രാപ്പകല് ജോലി ചെയ്യുന്നുണ്ടെന്നും അദ്ദേഹം പറഞ്ഞു.
ക്രമീകരണങ്ങള് വിലയിരുത്താന് ഇന്നലെ ന്യൂദല്ഹി റെയില്വേ സ്റ്റേഷന് സന്ദര്ശിച്ചശേഷം മാധ്യമങ്ങളോട് സംസാരിക്കുകയായിരുന്നു കേന്ദ്രമന്ത്രി. റെയില്വേ ബോര്ഡ് വാര് റൂമിന് പുറമെ ന്യൂദല്ഹി റെയില്വേ സ്റ്റേഷന്, ആനന്ദ് വിഹാര് റെയില്വേ സ്റ്റേഷന് എന്നിവിടങ്ങളില് കഴിഞ്ഞ ദിവസങ്ങളിലും മന്ത്രി നേരിട്ട് എത്തി ക്രമീകരണങ്ങള് വിലയിരുത്തിയിരുന്നു.
12,011 പ്രത്യേക ട്രെയിനുകളാണ് ഈ ഉത്സവ സീസണില് മാത്രം സര്വ്വീസ് നടത്തുന്നത്. കഴിഞ്ഞ വര്ഷം ഇതേകാലയളവില് 7724 പ്രത്യേക ട്രെയിനുകളാണ് സര്വീസ് നടത്തിയിരുന്നത്.
