മുംബൈ : രാജ്യത്തിന്റെ അഭിമാന വിമാനവാഹിനിക്കപ്പലായ ഐഎൻഎസ് വിക്രാന്തിൽ നാവികസേനാംഗങ്ങൾക്കൊപ്പം ഈ വർഷം ദീപാവലി ആഘോഷിക്കാൻ കഴിഞ്ഞതിൽ ഭാഗ്യമുണ്ടെന്ന് പ്രധാനമന്ത്രി നരേന്ദ്ര മോദി. തിങ്കളാഴ്ച ഗോവയിൽ നാവിക സേനയ്ക്കൊപ്പം ദീപാവലി ആഘോഷിക്കുകയായിരുന്നു അദ്ദേഹം.
“ഇന്നലെ മുതൽ ഞാൻ നിങ്ങളിലൊരാളായി ഇവിടെയുണ്ട്, കടന്നുപോയ ഓരോ നിമിഷത്തിലും ഞാൻ ജീവിതത്തിലേക്ക് എന്തെങ്കിലും പഠിച്ചിട്ടുണ്ട്. നിങ്ങളുടെ സമർപ്പണം വളരെ ഉയർന്നതാണ്, എനിക്ക് അത് അനുഭവിക്കാൻ കഴിഞ്ഞില്ല, പക്ഷേ ഞാൻ തീർച്ചയായും അത് മനസിലാക്കിയിട്ടുണ്ട്. ഇതിലൂടെ ജീവിക്കാൻ എത്ര ബുദ്ധിമുട്ടായിരിക്കുമെന്ന് എനിക്ക് ഊഹിക്കാൻ കഴിയും.”-വിമാനവാഹിനിക്കപ്പലിൽ രാത്രി ചെലവഴിച്ചതിന്റെ അനുഭവം വിവരിച്ചുകൊണ്ട് അദ്ദേഹം ഉദ്യോഗസ്ഥരോട് പറഞ്ഞു. രാത്രിയിൽ ആഴക്കടലും പുലർച്ചെ സൂര്യോദയവും കാണുന്നത് തന്റെ ദീപാവലിയെ കൂടുതൽ സവിശേഷമാക്കിയെന്നും പ്രധാനമന്ത്രി മോദി പറഞ്ഞു.
കൂടാതെ ഐഎൻഎസ് വിക്രാന്ത് പാകിസ്ഥാനിൽ ഭീതി പരത്തി, അത് അവർക്ക് ഉറക്കമില്ലാത്ത രാത്രികൾ നൽകി എന്നും പ്രധാനമന്ത്രി പറഞ്ഞു. തദ്ദേശീയ വിമാനവാഹിനിക്കപ്പലിലെ നാവിക ഉദ്യോഗസ്ഥരെ ദീപാവലി പ്രസംഗത്തിൽ അഭിസംബോധന ചെയ്യുന്നതിനിടെ, ഇന്ത്യൻ നാവികസേനയുടെ ശക്തിയുടെയും ജാഗ്രതയുടെയും പാരമ്പര്യത്തെ പ്രധാനമന്ത്രി മോദി പ്രശംസിച്ചു.
ഇന്ത്യയുടെ സമുദ്രശക്തിയുടെയും ദേശീയ അഭിമാനത്തിന്റെയും പ്രതീകമാണ് ഐഎൻഎസ് വിക്രാന്ത് എന്ന് അദ്ദേഹം വിശേഷിപ്പിച്ചു. തദ്ദേശീയ വിമാനവാഹിനിക്കപ്പലായ ഐഎൻഎസ് വിക്രാന്തിലെ രാജ്യത്തെ ധീരരായ നാവിക ഉദ്യോഗസ്ഥരോടൊപ്പം ദീപാവലി ആഘോഷിക്കാൻ കഴിഞ്ഞത് തന്റെ ഭാഗ്യമാണെന്നും പ്രധാനമന്ത്രി നരേന്ദ്ര മോദി പറഞ്ഞു.
