കൊച്ചി: സാങ്കേതികത്തികവും നിര്മാണ വൈദഗ്ധ്യവും ഒരുപോലെ സമന്വയിച്ച മൂന്ന് വ്യത്യസ്തയിനം കപ്പലുകള് നീറ്റിലിറക്കി കൊച്ചിന് ഷിപ്യാര്ഡ്. നാവികസേനയ്ക്ക് വേണ്ടി നിര്മിച്ച അന്തര്വാഹിനി ആക്രമണ പ്രതിരോധ കപ്പല്, ഹൈബ്രിഡ് ഇലക്ട്രിക് മെഥനോള്-റെഡി കമ്മിഷനിങ് സര്വീസ് ഓപ്പറേഷന് വെസല്, രാജ്യത്തെ ഏറ്റവും വലിയ ഡ്രഡ്ജറായ ഡിസിഐ ഡ്രഡ്ജ് ഗോദാവരി എന്നിവയാണ് നീറ്റിലിറക്കിയത്.
രാജ്യത്തിന്റെ നാവിക പ്രതിരോധ മേഖല, വാണിജ്യ കപ്പല് നിര്മാണം, ഹരിത സമുദ്രഗതാഗതം എന്നിവയില് കപ്പല്ശാല കരസ്ഥമാക്കിയ എന്ജിനീയറിങ് വൈദഗ്ധ്യത്തിന്റെയും നേതൃത്വ മികവിന്റെയും തെളിവാണ് പുതിയ കപ്പലുകള്. പ്രധാനമന്ത്രിയുടെ മാരിടൈം ഇന്ത്യ വിഷന് 2030, ആത്മനിര്ഭര് ഭാരത് പദ്ധതികള്ക്ക് കീഴില് സുസ്ഥിര സമുദ്ര വികസനം ലക്ഷ്യമിട്ടുള്ള പ്രവര്ത്തനങ്ങള്ക്കും ഇത് കരുത്താകും.
നേവിക്കു വേണ്ടി നിര്മിച്ച ആറാമത്തെ അന്തര്വാഹിനി ആക്രമണ പ്രതിരോധ കപ്പലിന്റെ ലോഞ്ചിങ് നാവികസേന വൈസ് അഡ്മിറല് ആര്. സ്വാമിനാഥന്റെ പത്നി രേണു രാജാറാം നിര്വഹിച്ചു. 12,000 ക്യുബിക് മീറ്റര് കപ്പാസിറ്റിയുള്ള രാജ്യത്തെ ഏറ്റവും വലിയ സക്ഷന് ഹോപ്പര് ഡ്രഡ്ജര് ‘ഡിസിഐ ഡ്രഡ്ജ് ഗോദാവരി’യുടെ ലോഞ്ചിങ് ഡ്രഡ്ജിങ് കോര്പറേഷന് ഓഫ് ഇന്ത്യ പ്രതിനിധി ശിരോഭൂഷണം സുജാത നിര്വഹിച്ചു. തീരത്തുനിന്ന് വളരെ അകലെയായി സ്ഥിതിചെയ്യുന്ന കാറ്റാടിപ്പാടങ്ങളുടെ കമ്മിഷനിങ്, സര്വീസ്, മറ്റു പ്രവൃത്തികള് എന്നിവയ്ക്കായി പ്രത്യേകം രൂപകല്പന ചെയ്ത ഹൈബ്രിഡ് ഇലക്ട്രിക് മെഥനോള്- റെഡി കമ്മിഷനിങ് സര്വീസ് ഓപ്പറേഷന് വെസലിന്റെ ലോഞ്ചിങ് കൊച്ചി പോര്ട്ട് അതോറിറ്റി ചെയര്പേഴ്സണ് ബി. കാശിവിശ്വനാഥന്റെ പത്നി വസന്ത നിര്വഹിച്ചു.
അന്തര്വാഹിനി ആക്രമണ പ്രതിരോധ കപ്പല് രാവിലെയും ഹൈബ്രിഡ് ഇലക്ട്രിക് മെഥനോള്- റെഡി കമ്മിഷനിങ് സര്വീസ് ഓപ്പറേഷന് വെസല്, ഡിസിഐ ഡ്രഡ്ജര് ഗോദാവരി എന്നിവ ഉച്ചയ്ക്ക് ശേഷവുമാണ് നീറ്റിലിറക്കിയത്. ചടങ്ങില് നാവികസേന വൈസ് അഡ്മിറല് ആര്. സ്വാമിനാഥന്, കൊച്ചി പോര്ട്ട് അതോറിറ്റി ചെയര്പേഴ്സണ് ബി. കാശിവിശ്വനാഥന്, ഡ്രഡ്ജിങ് കോര്പറേഷന് ഓഫ് ഇന്ത്യ ലിമിറ്റഡ് ചെയര്മാന് ഡോ. എം. അംഗമുത്തു, പെലാജിക് വിന്ഡ് സര്വീസസ് സിഇഒ ആന്ദ്രെ ഗ്രോനെവെല്ഡ്, കൊച്ചിന് ഷിപ്യാര്ഡ് സിഎംഡി മധു എസ്. നായരും പങ്കെടുത്തു.
