ന്യൂദല്ഹി: ആഗോളതലത്തിലുള്ള വ്യാപാര തടസ്സങ്ങളും യുഎസ് തീരുവയും വെല്ലുവിളി ഉയര്ത്തുമ്പോഴും ഈ സാമ്പത്തിക വര്ഷത്തില് ഇന്ത്യ കയറ്റുമതിയില് വളര്ച്ച രേഖപ്പെടുത്തുമെന്നു തന്നെയാണ് പ്രതീക്ഷിക്കുന്നതെന്ന് വാണിജ്യ വ്യവസായ മന്ത്രി പീയൂഷ് ഗോയല് പറഞ്ഞു.
2025-26 സാമ്പത്തിക വര്ഷത്തിലെ ഏപ്രില്-സെപ്റ്റംബര് കാലയളവില് രാജ്യത്തിന്റെ മൊത്തത്തിലുള്ള ചരക്ക്, സേവന കയറ്റുമതി കഴിഞ്ഞ വര്ഷത്തെ ഇതേ കാലയളവിനെ അപേക്ഷിച്ച് ഏകദേശം 5 ശതമാനം വര്ധിച്ച് 413.3 ബില്യണ് ഡോളറിലെത്തി. സാമ്പത്തിക വര്ഷത്തിന്റെ ആദ്യ പകുതിയില് ചരക്ക് കയറ്റുമതി 3 ശതമാനം ഉയര്ന്ന് 220.12 ബില്യണ് ഡോളറിലെത്തി.
‘പ്രതിരോധശേഷിയുണ്ട്, ആത്മവിശ്വാസമുണ്ട്, ലോകമെമ്പാടും നമ്മുടെ സാധനങ്ങള്ക്കും സേവനങ്ങള്ക്കും ആവശ്യക്കാരുണ്ട്, ഇന്ത്യ ഈ വളര്ച്ചാ പാതയില് തുടരും. ഇന്ത്യയുടെ കയറ്റുമതി ഈ വര്ഷം അവസാനം വരെ അനുകൂലമായ വളര്ച്ച നിലനിര്ത്തുമെന്ന് ഞങ്ങള്ക്ക് ഉറപ്പുണ്ട്,’ അദ്ദേഹം ന്യൂഡല്ഹിയില് മാധ്യമപ്രവര്ത്തകരോട് പറഞ്ഞു.
തീരുവ ചുമത്തല് മൂലം സെപ്റ്റംബറില് യുഎസിലേക്കുള്ള ഇന്ത്യയുടെ കയറ്റുമതി ഏകദേശം 12 ശതമാനം കുറഞ്ഞതായി മന്ത്രി ചൂണ്ടിക്കാട്ടി.
