ന്യൂദല്ഹി : വിമുക്ത സൈനികര്ക്കായുള്ള പങ്കാളിത്ത ആരോഗ്യ പദ്ധതി (ECHS) പ്രകാരം, ECHS പോളിക്ലിനിക്കുകളില് ലഭ്യമല്ലാത്ത മരുന്നുകളുടെ ബുക്കിംഗ്, സംഭരണം, വീട്ടില് എത്തിച്ചുനല്കല് എന്നിവ സുഗമമാക്കുന്നതിന് വിമുക്ത സൈനിക വകുപ്പുമായി സഹകരിച്ച് തപാല് വകുപ്പ് പ്രത്യേക സേവനം ആരംഭിച്ചു.
ഈ സംരംഭത്തിന് കീഴില്, ECHS പോളിക്ലിനിക്കുകളില് പ്രവര്ത്തിക്കുന്ന ഗ്രാമീണ സംരംഭക പൊതു സേവന കേന്ദ്രങ്ങള് വഴി മരുന്നുകള് സംഭരിക്കുകയും പാക്കേജ് ചെയ്യുകയും ചെയ്യും. തുടര്ന്ന് ഇത് ഇന്ത്യ പോസ്റ്റിന്റെ വിശ്വസ്ത വിതരണ ശൃംഖലയിലൂടെ ഉപഭോക്താവിന്റെ വീട്ടിലെത്തിച്ചു നല്കും. മരുന്നുകള് രാജ്യത്തിന്റെ എല്ലാ കോണിലുമുള്ള ECHS ഗുണഭോക്താക്കളിലേക്ക് കാര്യക്ഷമവും സുരക്ഷിതവുമായി എത്തുന്നുണ്ടെന്ന് ഈ ക്രമീകരണം ഉറപ്പാക്കുന്നു.
ദല്ഹിയില് ജൂലൈ 31 ന് പരീക്ഷണാടിസ്ഥാനത്തില് ആദ്യമായി ആരംഭിച്ച ഈ സേവനത്തിന് പ്രോത്സാഹജനകമായ പ്രതികരണം ലഭിക്കുകയും പിന്നീട് ഹരിയാന, ഉത്തര്പ്രദേശ് എന്നിവ ഉള്ക്കൊള്ളുന്ന NCR മേഖലയിലേക്ക് വ്യാപിപ്പിക്കുകയും ചെയ്തു. ഇത്തരത്തില് പൈലറ്റ് പദ്ധതിയിലൂടെ 1700-ലധികം മരുന്ന് പാക്കറ്റുകള് വിജയകരമായി എത്തിച്ചു നല്കിയതിന്റെ അടിസ്ഥാനത്തില്, രാജ്യത്തുടനീളമുള്ള 458 ഇസിഎച്ച്എസ് കേന്ദ്രങ്ങളുടെ സമഗ്രമായ മാപ്പിംഗ് പ്രവര്ത്തനം പൂര്ത്തിയാക്കി. ഇന്ന് മുതല് രാജ്യമെമ്പാടും ഈ സേവനം ലഭ്യമായി തുടങ്ങി.
