ന്യൂദല്ഹി : ഫിറ്റ് ഇന്ത്യ’ സംരംഭത്തിന് കീഴില് കേന്ദ്ര കായിക യുവജനകാര്യ മന്ത്രാലയവും തൊഴില് മന്ത്രാലയവും സംയുക്തമായി സര്ദാര് വല്ലഭായ് പട്ടേലിന്റെ 150-ാം ജന്മവാര്ഷികത്തിന്റെ അനുസ്മരണത്തോടനുബന്ധിച്ച് ഈ മാസം 31മുതല് ‘ഐക്യത്തിന്റെ ഉരുക്കുചക്രങ്ങള്’ എന്ന പേരില് രണ്ട് രാജ്യവ്യാപക സൈക്കിള് പര്യടനങ്ങള് സംഘടിപ്പിക്കും. രാജ്യത്തിന്റെ മുക്കിലും മൂലയിലും എത്തിച്ചേരുന്ന പര്യടനങ്ങള് ദേശീയ ഐക്യത്തിന്റെയും ഇന്ത്യയുടെ ആരോഗ്യപൂര്ണവും കരുത്തുറ്റതുമായ മനോഭാവത്തിന്റെയും പ്രതീകമാകും.
കശ്മീര് മുതല് കന്യാകുമാരി വരെ സംഘടിപ്പിക്കുന്ന സൈക്കിള് പര്യടനം 31-ന് ജമ്മുകശ്മീരിലെ ശ്രീനഗറില് നിന്ന് ആരംഭിച്ച് പഞ്ചാബ്, ദഡല്ഹി, രാജസ്ഥാന്, ഗുജറാത്ത്, മഹാരാഷ്ട്ര, കര്ണാടക എന്നീ സംസ്ഥാനങ്ങള് പിന്നിട്ട് നവംബര് 16-ന് തമിഴ്നാട്ടിലെ കന്യാകുമാരിയില് അവസാനിക്കുന്നതോടെ 4480 കിലോമീറ്റര് ദൂരം പൂര്ത്തിയാക്കും. പരിപാടിയില് 150 സൈക്കിള് യാത്രികര് ഭാഗമാകും.
എവറസ്റ്റ് കൊടുമുടി കീഴടക്കുകയും ‘കാലാവസ്ഥാ വ്യതിയാനത്തിന് മുന്പ് സ്വയം മാറാം’ എന്ന സന്ദേശവുമായി ഇന്ത്യയില് നിന്ന് ലണ്ടനിലേക്ക് സൈക്കിള് യാത്ര നടത്തുകയും ചെയ്ത പര്വതാരോഹക നിഷാ കുമാരിയാണ് കശ്മീര് – കന്യാകുമാരി പര്യടനത്തിന് നേതൃത്വം നല്കുന്നത്.
മറ്റൊരു സൈക്കിള് പര്യടനമായ ‘പെഡല് ടു പ്ലാന്റ്’ അരുണാചല് പ്രദേശിലെ പാങ്സൗവില് നിന്ന് ആരംഭിച്ച് അസം, പശ്ചിമ ബംഗാള്, ബിഹാര്, ഉത്തര്പ്രദേശ്, മധ്യപ്രദേശ് സംസ്ഥാനങ്ങളിലൂടെ സഞ്ചരിച്ച് 4000 കിലോമീറ്റര് ദൂരം പിന്നിട്ട് ഡിസംബര് 31-ന് ഗുജറാത്തിലെ മുന്ദ്രയില് അവസാനിക്കും. പര്യടനത്തിനിടെ സൈക്കിള് യാത്രികര് ഒരുലക്ഷം വൃക്ഷത്തൈകള് നടുകയും കാലാവസ്ഥ, ശാരീരികക്ഷമത എന്നിവയുമായി ബന്ധപ്പെട്ട് സ്കൂളുകളിലും കോളേജുകളിലും അവബോധ പരിപാടികള് നടത്തുകയും ചെയ്യും.
ഫിറ്റ് ഇന്ത്യയുടെ ‘ഐക്യത്തിന്റെ ഉരുക്കുചക്രങ്ങള്’ കാമ്പയിനില് പങ്കെടുക്കുന്ന സൈക്കിള് യാത്രികര്ക്ക് ആശംസകള് നേരുന്നതായി കേന്ദ്ര യുവജനകാര്യ, കായിക, തൊഴില്, ഉദ്യോഗ മന്ത്രി ഡോ. മന്സുഖ് മാണ്ഡവ്യ പറഞ്ഞു. മഹാനായ സ്വാതന്ത്ര്യസമര സേനാനിയും രാഷ്ട്രതന്ത്രജ്ഞനുമായ സര്ദാര് വല്ലഭായ് പട്ടേലിന് ആദരവായാണ് പരിപാടി സംഘടിപ്പിക്കുന്നത്. രാജ്യത്തെ പൗരന്മാര് കൂടുതല് ആരോഗ്യവാന്മാരും ശക്തരുമാകാന് പ്രധാനമന്ത്രി നരേന്ദ്ര മോദി ആഗ്രഹിക്കുന്നു. പ്രസ്തുത കാഴ്ചപ്പാടിന് ശക്തി പകരാനും സജീവ ജീവിതശൈലി സ്വീകരിക്കുന്നതിനെക്കുറിച്ച് അവബോധം സൃഷ്ടിക്കാനും ഈ സംരംഭം സഹായിക്കും. ശാരീരികക്ഷമത നിലനിര്ത്തുന്നതിനുള്ള മികച്ച മാര്ഗമാണ് സൈക്കിള് യാത്രയെന്നും ഇത് മലിനീകരണത്തിന് പരിഹാരമാണെന്നും അദ്ദേഹം പറഞ്ഞു. ഓരോ ഇന്ത്യക്കാരനും സൈക്കിള് സവാരി ഏറ്റെടുക്കാനും സ്വന്തം ശാരീരികക്ഷമത നിലനിര്ത്താന് കുറഞ്ഞത് 30 മിനിറ്റ് മുതല് ഒരു മണിക്കൂര് വരെ നീക്കിവെക്കാനും ഡോ. മന്സുഖ് മാണ്ഡവ്യ അഭ്യര്ത്ഥിച്ചു.
