കൊല്ലം: കെഎസ്ആര്ടിസി ബസിന് മുന്നില് കുടിവെളള കുപ്പികള് കിടന്നതിന് ഡ്രൈവറെ സ്ഥലംമാറ്റിയ നടപടി ഹൈക്കോടതി റദ്ദാക്കിയതില് പ്രതികരിച്ച് ഗതാഗത മന്ത്രി കെബി ഗണേശ് കുമാര്.ഹൈക്കോടതിയില് സീനിയര് അഭിഭാഷകയെ വയ്ക്കാന് പണം നല്കിയത് യുഡിഎഫ് ആണെന്ന് മന്ത്രി പറഞ്ഞു.
കെഎസ്ആര്ടിസി നന്നാവരുതെന്നാണ് ഇവരുടെ ആഗ്രഹം.കെഎസ്ആര്ടിസി നശിക്കാന് ആഗ്രഹിക്കുന്ന യൂണിയന്റെ പ്രവര്ത്തനങ്ങളെ അഭിനന്ദിക്കുന്നുവെന്നും മന്ത്രി പരിഹസിച്ചു.
ഡ്രൈവറുടെ സ്ഥലംമാറ്റം റദ്ദാക്കിയ കോടതി ഉത്തരവ് അംഗീകരിക്കുന്നു. എന്നാല്, വകുപ്പുതല നടപടി സ്വീകരിക്കുന്നതില് തടസമില്ല.
മതിയായ കാരണം ഇല്ലാതെയാണ് സ്ഥലംമാറ്റം എന്ന് നിരീക്ഷിച്ചാണ് ജസ്റ്റിസ് എന് നഗരേഷിന്റെ നടപടി.കുടിവെളളമല്ലേ ബസില് ഉണ്ടായിരുന്നതെന്ന് കോടതി പറഞ്ഞു.ഹര്ജിക്കാരനെ പൊന്കുന്നം യൂണിറ്റില് തന്നെ ജോലിയില് തുടരാന് അനുവദിക്കണമെന്നും കോടതി നിര്ദേശിച്ചു. പുതുക്കാട് ഡിപ്പോയിലേക്ക് മാറ്റിയ ഉത്തരവ് റദ്ദാക്കണമെന്നായിരുന്നു ഡ്രൈവര് ജയ്മോന് ജോസഫിന്റെ ആവശ്യം.
മന്ത്രി കെബി ഗണേശ് കുമാറിന്റെ നിര്ദ്ദേശാനുസരണമാണ് ഡ്രൈവര് ജയ്മോന് ജോസഫിനെ സ്ഥലംമാറ്റിയത്. ബസ് വൃത്തിയായി സൂക്ഷിക്കാത്തതിന് മന്ത്രി ശകാരിക്കുകയും ചെയ്തു.
