ആലപ്പുഴ: സി പി എം ആലപ്പുഴ ജില്ലാ നേതൃത്വം അവഗണിക്കുകയും നേതാക്കളുടെ വിമര്ശനത്തിന് പാത്രമാവുകയും ചെയ്തതിനെ തുടര്ന്ന് പരസ്യമായി ജില്ലാ നേതൃത്വത്തെ കുറ്റപ്പെടുത്തിയ മുതിര്ന്ന നേതാവ് ജി സുധാകരനെ അനുനയിപ്പിക്കാനുളള ശ്രമത്തിലാണ് സി പി എം. കേന്ദ്ര കമ്മിറ്റി അംഗം സി എസ് സുജാത, ആലപ്പുഴ ജില്ലാ സെക്രട്ടറി ആര് നാസര്, ജില്ലാ സെക്രട്ടേറിയറ്റ് അംഗം ജി സത്യപാലന് എന്നിവര് ജി സുധാകരന്റെ വീട്ടിലെത്തി സംസാരിച്ചു.
സിപിഎം നടത്തുന്ന വി എസ് അച്യുതാനന്ദന് സ്മാരക കേരള പുരസ്കാരം വിതരണ ചടങ്ങിലേക്ക് സുധാകരനെ നേതാക്കള് ക്ഷണിച്ചു. കുട്ടനാട്ടില് ഞായറാഴ്ചയാണ് പരിപാടി. പരിപാടിയില് എംഎ ബേബി, എംവി ഗോവിന്ദന്, സജി ചെറിയാന് എന്നിവര് പങ്കെടുക്കും.
പാര്ട്ടിയുടെ വരാനിരിക്കുന്ന എല്ലാ പരിപാടികളിലും ജി സുധാകരനെ പങ്കെടുപ്പിക്കാനാണ് പാര്ട്ടി നേതൃത്വത്തിന്റെ തീരുമാനം.ജി സുധാകരനെതിരെ പരസ്യ പ്രതികരണങ്ങള് പാടില്ലെന്ന് നേതാക്കള്ക്ക് നിര്ദേശങ്ങള് നല്കി.മന്ത്രി സജി ചെറിയാന്റെ പരാമര്ശങ്ങളിലുളള അതൃപ്തി സുധാകരന് നേതാക്കളെ അറിയിച്ചു.
ജി സുധാകരന്റെ പരാതികളില് എടുത്ത നടപടികള് നേതൃത്വം നേരിട്ട് ബോധ്യപ്പെടുത്തി.പാര്ട്ടി നേതാക്കള്ക്കെതിരെയുള്ള പരസ്യ വിമര്ശനങ്ങള് ഒഴിവാക്കണമെന്നും ആവശ്യപ്പെട്ടു.എന്നാല്, സിപിഎം പരിപാടിയില് പങ്കെടുക്കുന്നത് സംബന്ധിച്ച് തീരുമാനിച്ചില്ലെന്നും പാര്ട്ടി നേതൃത്വത്തിന്റെ നടപടികളില് തൃപ്തനല്ലെന്നും ജി സുധാകരന് പറഞ്ഞു.
അതേസമയം,കോണ്ഗ്രസും ബി ജെ പിയും സി പി എമ്മിനെ വിമര്ശിക്കുന്നത് പോലെ സുധാകരന് സംസാരിക്കുന്നതിനാലാണ് അദ്ദേഹത്തെ കുറ്റപ്പെടുത്തിയതെന്ന് ജില്ലാ സെക്രട്ടറി നാസര് പറഞ്ഞു.
പാര്ട്ടിക്കതീതമായി സ്വീകാര്യതയുളള ജി സുധാകരനെ തെരഞ്ഞെടുപ്പ് അടുത്ത് വരവെ പിണക്കുന്നത് ബുദ്ധിയല്ലെന്നാണ് സി പി എം കരുതുന്നത്. അടുത്തിടെ കോണ്ഗ്രസ് സംഘടിപ്പിച്ച പരിപാടിയില് സുധാകരന് പങ്കെടുത്തിരുന്നു.
