മുംബൈ: റംസാന് പുതിയ വസ്ത്രങ്ങള് പോലും വാങ്ങാന് സാധിക്കാത്ത ഒരു സമയം എന്റെ ജീവിതത്തിലുണ്ടായിരുന്നു. സാമ്പത്തികമായിരുന്നു പ്രശ്നം. പിതാവ് ഒരു സാധാരണ കര്ഷകന്. ആവശ്യത്തിനുള്ള പണം പേലും ഉണ്ടായിരുന്നില്ല. ഗ്രാമത്തിലെ ആളുകള് പോലും ഞങ്ങളെ അവജ്ഞയോടെ കണ്ടിരുന്നു’ – മറൂഫ അക്തര് ഇത് പറയുമ്പോള് അവളുടെ കണ്ഠമിടറി.
ആരാണ് മറൂഫ അക്തര്
വനിതാ ലോകകപ്പില് കളിക്കുന്നതിനായി ഭാരതത്തിലെത്തിയ ബംഗ്ലാദേശ് താരമാണ് മറൂഫ. കഷ്ടപ്പാടിന്റെ തീച്ചൂളയില് വളര്ന്ന മറൂഫ തനിക്ക് ലഭിച്ച ആദ്യ അവസരം തന്നെ മികവുറ്റതാക്കിക്കൊണ്ട് പ്ലെയര് ഓഫ് ദ മാച്ച് തന്നെ ആയി.
പാകിസ്ഥാനെതിരായ ആദ്യ ലോകകപ്പ് മത്സരത്തില് രണ്ട് വിക്കറ്റ് നേടിയ മറൂഫ കളിയിലെ താരമായിരുന്നു. മത്സരത്തില് മിന്നും ജയമായിരുന്നു ബംഗ്ലാദേശ് നേടിയത്. അതാകട്ടെ, മറൂഫയുടെ മികവിലും. ബംഗ്ലാദേശ് ദേശീയ ടീമിലെത്തുന്നതിനു മുമ്പ് താന് അനുഭവിച്ച കഷ്ടപ്പാടുകളെക്കുറിച്ച് മറൂഫ അനുഭവിച്ച കഷ്ടപ്പാടുകള് ഇന്ന് സോഷ്യല് ഇടത്തില് ചര്ച്ചയാണ്.
മറൂഫയുടെ ഇച്ഛാശക്തിയെയും ജീവിത വിജയത്തെയും ഏവരും പുകഴ്ത്തുകയാണ്. സാമ്പത്തിക പ്രശ്നങ്ങള് കാരണം നാട്ടില് നടക്കുന്ന വിവാഹങ്ങളില് ഞങ്ങളെ ആരും ക്ഷണിക്കാറില്ല. ഇനി ക്ഷണിച്ചാല് തന്നെ നല്ല ഒരു വസ്ത്രം പോലുമില്ല. ഏതെങ്കിലും വിവാഹത്തിനു ക്ഷണിക്കപ്പെട്ട് അവിടെയെത്തിയാല് ഞങ്ങളെ എല്ലാവരും കളിയാക്കും- വിങ്ങിപ്പൊട്ടി മറൂഫ പറയുന്നു. എന്നാല്, ഇപ്പോള് താന് അതീവ സന്തുഷ്ടയാണെന്നും ആണ്കുട്ടികള്ക്കുപോലും ചെയ്യാന് സാധിക്കാത്ത തരത്തില് തന്റെ മാതാപിതാക്കളെയും സഹോദരങ്ങളെയും നോക്കാനാകുന്നുണ്ടെന്നും മറൂഫ പറയുമ്പോള് അവളുടെ കണ്ണുകള് തിളങ്ങി. ആളുകളൊക്കെ ആരാധനയോടെ നോക്കുമ്പോള് അഭിമാനവും ഒപ്പം തെല്ല് നാണവുമുണ്ടെന്ന് മറൂഫ കൂട്ടിച്ചേര്ത്തു. പാകിസ്ഥാനെതിരായ മത്സരത്തില് 10 ഓഴറില് 31 റണ്സ് മാത്രം വഴങ്ങി മറൂഫ രണ്ട് വിക്കറ്റ് സ്വന്തമാക്കി. ബംഗ്ലാദേശിന്റെ ഏഴു വിക്കറ്റ് വിജയത്തില് മറൂഫയുടെ ഈ പ്രകടനം നിര്ണായകമായി.
