കട്ടപ്പന: ശബരിമല മണ്ഡലകാലം ആരംഭിക്കാന് ഇനി ഒന്നരമാസം ശേഷിച്ചിരിക്കെ കമ്പംമെട്ടില് ഇടത്താവളം ഒരുക്കുമെന്ന് സര്ക്കാര് പ്രഖ്യാപനത്തിന് ആറു വര്ഷം തികയുകയാണ്. 2019ലെ ബജറ്റിലാണ് ഇടത്താവളം ഒരുക്കുന്നതിന് നാലുകോടി രൂപ സര്ക്കാര് വകയിരുത്തിയത്. എന്നാല് ഇക്കാലത്ത് കോവിഡ് പ്രതിസന്ധി രൂക്ഷമായ സാഹചര്യത്തില് മറ്റു നടപടികളൊന്നും ഉണ്ടായില്ല.
പിന്നീട് 2022 ജനുവരിയില് സ്ഥലം ഏറ്റെടുക്കുന്നതിന് കരുണാപുരം പഞ്ചായത്തിന് ആദ്യഘട്ടമായി തുക അനുവദിച്ചത്. ഇതേ തുടര്ന്ന് കമ്പംമെട്ട് കമ്മ്യൂണിറ്റി ഹാളിന് സമീപം ഒരു സ്വകാര്യ എസ്റ്റേറ്റ് ഉടമ സൗജന്യമായി വിട്ടു നല്കിയ 20 സെന്റ് ഉള്പ്പെടെ 65 സെന്റ് സ്ഥലം പഞ്ചായത്ത് വാങ്ങി രജിസ്ട്രേഷന് നടപടികള് പൂര്ത്തിയാക്കുകയും ചെയ്തിരുന്നു. ഇതിനിടയില് യാതൊരുവിധ അടിസ്ഥാനസൗകര്യങ്ങളും ഇല്ലാത്ത താല്ക്കാലിക സംവിധാനം ഒരുക്കിയെങ്കിലും അത് ഉപയോഗശൂന്യമായ അവസ്ഥയിലാണ്. ഇവിടെ സ്ഥിരമായി വെള്ളം ലഭിക്കുന്നില്ല എന്ന് മാത്രമല്ല വെളിച്ചത്തിനുള്ള സൗകര്യവുമില്ല. മണ്ഡലകാലത്ത് കമ്പംമെട്ട് അതിര്ത്തി കടന്ന് ലക്ഷക്കണക്കിന് അയ്യപ്പഭക്തരാണ് എത്തുന്നത് ഇവരില് ഭൂരിഭാഗവും തമിഴ്നാട് കര്ണാടക തെലുങ്കാന ആന്ധ്രാപ്രദേശ് എന്നിവിടങ്ങളില് നിന്നുള്ള തീര്ത്ഥാടകരാണ്.
കുമളിയിലെ അനിയന്ത്രിതമായ തിരക്ക് പരിഗണിച്ച് ഏതാനും വര്ഷങ്ങളായി അയ്യപ്പഭക്തരുടെ വാഹനങ്ങള് കമ്പംമെട്ട് കട്ടപ്പന കുട്ടിക്കാനം വഴിയാണ് തിരിച്ചുവിടുന്നത്. ഇതുവഴി എത്തുന്ന തീര്ത്ഥാടകര്ക്ക് വിശ്രമിക്കാനുള്ള ഏക ഇടത്താവളം കമ്പംമെട്ട് മാത്രമാണ്. നിലവില് വാഹനങ്ങള് റോഡ് അരികിലും വ്യാപാരസ്ഥാപനങ്ങള്ക്ക് മുന്നിലും ആണ് പാര്ക്ക് ചെയ്യുന്നത്. ഇത് മണ്ഡലകാലത്ത് അനിയന്ത്രിതമായ വാഹനക്കുരുക്കിന് കാരണമാകാറുണ്ട്. താല്ക്കാലിക വിശ്രമ കേന്ദ്രത്തില് പ്രാഥമികാവശ്യം നിറവേറ്റുന്നതിനും മറ്റുമുള്ള അടിസ്ഥാന സൗകര്യങ്ങള് ഒരുക്കണമെന്നും പ്രഖ്യാപിച്ച വിപുലമായ ഇടത്താവള നിര്മ്മാണം ഇനിയെങ്കിലും ആരംഭിക്കണമെന്നുമുള്ള ആവശ്യം ശക്തമായി.
