പത്തനംതിട്ട: ശബരിമല ശ്രീകോവിലിലെ ദ്വാരപാലക ശില്പങ്ങളില് പൊതിഞ്ഞിരുന്ന സ്വര്ണപ്പാളികള് മാറ്റണമെന്ന് സ്വപ്നത്തില് സാക്ഷാല് അയ്യപ്പ സ്വാമിയുടെ നിര്ദേശം ലഭിച്ച ദേവസ്വം ബോര്ഡ് അംഗം ആരെന്ന ചോദ്യം വീണ്ടുമുയരുന്നു. പാളികളില് സ്വര്ണം പൂശലിന് പണം മുടക്കിയവരില് ഒരാളായ ബെംഗളൂരു വ്യവസായി വിനീത് ജയിനിനോടാണ് തനിക്കുണ്ടായ സ്വപ്ന ദര്ശനത്തെപ്പറ്റി ദേവസ്വം മെംബര് വെളിപ്പെടുത്തിയത്. ഈ അസുലഭ ഭാഗ്യം ലഭിച്ച മെംബറാരാണെന്ന് വ്യക്തമായാല് സ്വര്ണക്കൊള്ളയുടെ മുഴുവന് ചുരുളുമഴിയും.
ദ്വാരപാലക പാളികളില് സ്വര്ണം പൂശാന് തന്നെ പ്രേരിപ്പിച്ചത് ബോര്ഡ് മെംബര്ക്ക് ലഭിച്ച അയ്യപ്പ ദര്ശനമായിരുന്നെന്ന് വിനീത് ജയിന് നേരത്തേ പറഞ്ഞിരുന്നു. എന്നാല് ജയിനിനെ ചോദ്യം ചെയ്യാന് ഇതുവരെ ദേവസ്വം വിജിലന്സോ പ്രത്യേക അന്വേഷണ സംഘമോ തയാറായിട്ടില്ല.
സിപിഎം നേതൃത്വവുമായി ഏറെ ബന്ധമുള്ള ദേവസ്വം അംഗമാണ് ഭഗവാന് സ്വപ്ന ദര്ശനം നല്കിയ കഥ മെനഞ്ഞ് സ്വര്ണപ്പാളികള് പമ്പ കടത്താന് വഴിയൊരുക്കിയത്. സ്വര്ണപ്പാളി മാറ്റുമ്പോള് പുറത്തറിയാതിരിക്കാന് ചെമ്പുപാളിയില് സ്വര്ണം പൂശി പുനഃസ്ഥാപിക്കാന് സ്പോണ്സര്മാരെ ഉറപ്പാക്കാനാണ് ഈ സ്വപ്ന കഥ മെനഞ്ഞതെന്നു വ്യക്തം.
