പലയിടത്ത് പല തരത്തിലുള്ള ലേലങ്ങൾ നമ്മൾ കണ്ടിട്ടുണ്ട്. ഈ അടുത്തിടെ സൗദി അറേബ്യയിലും നടന്നു അത്തരമൊരു ലേലം . വാഹങ്ങളോ, വീടോ ഒന്നുമല്ല നല്ല ഒന്നാന്തരം മംഗോളിയൻ ഫാൽക്കൺ ആണ് അന്ന് വിറ്റു പോയത് . അതും ആരെയും അമ്പരിപ്പിക്കുന്ന വിലയിൽ.
സൗദി അറേബ്യയുടെ തലസ്ഥാനമായ റിയാദിൽ നടന്ന ഇന്റർനാഷണൽ സൗദി ഫാൽക്കൺ ആൻഡ് ഹണ്ടിംഗ് എക്സിബിഷൻ 2025 ലാണ് അപൂർവ്വ മംഗോളിയൻ ഫാൽക്കണെ പ്രദർശിപ്പിച്ചത് . ഈ പ്രദർശനത്തിൽ, ഇതുവരെയുള്ളതിൽ വച്ച് ഏറ്റവും വിലയേറിയ മംഗോളിയൻ ഫാൽക്കൺ 6,50,000 സൗദി റിയാലിന്, അതായത് ഏകദേശം 1.53 കോടി രൂപയ്ക്കാണ് വിറ്റു പോയത് .
ഇത് അറബ് ലോകത്തിന് ഫാൽക്കണുകളോടുള്ള സ്നേഹത്തെ പ്രതിഫലിപ്പിക്കുക മാത്രമല്ല, ആധുനിക യുഗത്തിൽ പാരമ്പര്യത്തിന്റെയും ആഡംബരത്തിന്റെയും സംഗമത്തിന്റെ പ്രതീകമായി മാറിയിരിക്കുന്നു ഈ ചരിത്ര ലേലം.ഈ വർഷത്തെ പ്രദർശനത്തിൽ ആകെ രണ്ട് മംഗോളിയൻ ഫാൽക്കണുകളെയാണ് ലേലത്തിന് വച്ചിരുന്നത്. ആദ്യത്തേത് ഒരു കുഞ്ഞു ഫാൽക്കൺ ആയിരുന്നു, അതിന്റെ വില 70,000 റിയാലായിരുന്നു. രണ്ടാമത്തേത്, വലുതും , പരിശീലനം ലഭിച്ചതുമായ ഫാൽക്കൺ ആയിരുന്നു. അതിന്റെ ലേലം തുടങ്ങിയത് 100,000 റിയാലിലായിരുന്നു. എന്നാൽ ഒടുവിൽ അത് 650,000 റിയാലിന് (1.53 കോടി രൂപ) വിറ്റു.
മംഗോളിയൻ ഫാൽക്കണുകൾ അവയുടെ ശക്തി, സഹിഷ്ണുത, വേട്ടയാടൽ കഴിവുകൾ എന്നിവയ്ക്ക് പേരുകേട്ടവയാണ്. സാധാരണ ഫാൽക്കണുകളെ അപേക്ഷിച്ച് അവ വലുതും ഭാരമുള്ളതുമാണ്, നീളവും ബലമേറിയതുമായ ചിറകുകൾ ഇവയ്ക്ക് ഉണ്ട്. തണുത്ത മംഗോളിയൻ കാലാവസ്ഥയിൽ വളർത്തുന്ന ഇവ മരുഭൂമിയിലും ചൂടുള്ള പ്രദേശങ്ങളിലും അതിശയകരമായ പ്രകടനം കാഴ്ചവയ്ക്കുന്നു. റിയാദിൽ നടന്ന ഈ പ്രദർശനത്തിൽ ഇത്തവണ 30-ലധികം രാജ്യങ്ങൾ പങ്കെടുത്തു. സൗദി ഫാൽക്കൺ ക്ലബ്ബാണ് ഇത് സംഘടിപ്പിച്ചത്
