തിരുവനന്തപുരം: ശബരിമല സ്വര്ണ കൊള്ള കേസുമായി ബന്ധപ്പെട്ട് എന്ഫോഴ്സ്മന്റ് ഡയറക്ടറേറ്റ് പ്രാഥമിക വിവര ശേഖരണം തുടങ്ങി.അന്വേഷണം നടത്തുന്നതിനോടനുബന്ധിച്ചാണ് ഇത്.
സ്വര്ണം കാണാതായ സംഭവത്തില് പ്രത്യേക അന്വേഷണ സംഘം കേസ് രജിസ്റ്റര് ചെയ്തതിന് പിന്നാലെയാണ് ഇഡി നടപടി.അതിനിടെ, ശബരിമലയിലെ സ്വര്ണക്കവര്ച്ചയില് ദേവസ്വം ബോര്ഡിനെ സംശയിക്കുന്ന റിപ്പോര്ട്ടാണ് ദേവസ്വം വിജിലന്സ് ഹൈക്കോടതിയില് സമര്പ്പിച്ചത്.
സ്വര്ണക്കവര്ച്ചയിലെ ദുരൂഹത വ്യക്തമാക്കുന്ന വിവരങ്ങളാണ് വിജിലന്സ് റിപ്പോര്ട്ടിലുള്ളത്.നിയമവിരുദ്ധമായി ഉദ്യോഗസ്ഥര് ചെയ്തത് ദേവസ്വം ബോര്ഡ് അധികാരികള് അറിഞ്ഞില്ലെന്ന് കരുതാന് ആകില്ലെന്ന് റിപ്പോര്ട്ടില് പറയുന്നു. ഉദ്യോഗസ്ഥ താല്പര്യം മാത്രമെന്ന് പറയാന് കഴിയില്ലെന്നും റിപ്പോര്ട്ടിലുണ്ട്.
2019 ലെ ബോര്ഡ് അധികാരികളുടെ പ്രേരണയോ സമ്മര്ദ്ദമോ നിര്ദ്ദേശമോ ഉണ്ടോയെന്ന് സംശയമുണ്ട്.നിയമവിരുദ്ധമായി ഉണ്ണികൃഷ്ണന് പോറ്റി ശബരിമല ദേവസ്വത്തിന് പുറത്തു കൊണ്ട് പോയി സ്വര്ണം പൂശാന് ഇടയായത് 2019 ലെ ബോര്ഡിന്റെ വീഴ്ചയാണ്.അതിനാല് ബോര്ഡിനെതിരെയും തുടര്നടപടി വേണമെന്നും ദേവസ്വം വിജിലന്സ് റിപ്പോര്ട്ടിലുണ്ട്.
എ പത്മകുമാര് പ്രസിഡന്റായ ഭരണസമിതിയുടെ കാലത്താണ് ഉണ്ണികൃഷ്ണന് പോറ്റി സ്വര്ണപ്പാളി ആദ്യം സ്വര്ണം പൂശാന് കൊണ്ടു പോയത്.ബോര്ഡിന് നഷ്ടമുണ്ടാക്കാനായി പ്രതികള് ഗൂഢാലോചന നടത്തിയെന്നാണ് ദേവസ്വം വിജിലന്സ് കണ്ടെത്തിയത്. പത്മകുമാര് പ്രസിഡന്റായ ബോര്ഡില് ശങ്കരദാസ്, കെ .രാഘവന് എന്നിവരായിരുന്നു അംഗങ്ങള്.
അതേസമയം, ശബരിമലയിലെ സ്വര്ണാപഹരണ കേസില് അന്വേഷണം ഉന്നതരിലേക്ക് നീളുകയാണ്. ശബരിമലയിലെ സ്വര്ണാപഹരണം സംബന്ധിച്ച് പ്രത്യേക അന്വേഷണസംഘം രജിസ്റ്റര് ചെയ്ത രണ്ടാം കേസിലെ എഫ് ഐആറില് ദേവസ്വം ബോര്ഡ് അംഗങ്ങളെയും പ്രതിചേര്ത്തു. 2019 ലെ ദേവസ്വം ബോര്ഡ് അംഗങ്ങളെയാണ് എട്ടാം പ്രതിയായി ചേര്ത്തിരിക്കുന്നത്.
