ശിവഗിരി : ദേവസ്വം ബോര്ഡ് ക്ഷേത്രങ്ങളുടെ ഭരണത്തിലും നടത്തിപ്പിലും പൂജാദി കര്മ്മങ്ങളിലും അധസ്ഥിത പിന്നോക്ക ജനവിഭാഗങ്ങള്ക്ക് മുഖ്യമായ പങ്കാളിത്തം നല്കണമെന്ന് ശിവഗിരി മഠം പ്രസിഡന്റ് സച്ചിദാനന്ദ സ്വാമി പറഞ്ഞു. ശബരിമല ക്ഷേത്രം കേന്ദ്രീകരിച്ച് നടന്നുവരുന്ന വിവാദങ്ങളോടുള്ള ചോദ്യങ്ങള്ക്ക് മറുപടി പറയുകയായിരുന്നു സ്വാമി.
ക്ഷേത്രങ്ങളുടെ അധ:പതനങ്ങള്ക്ക് അടിസ്ഥാന കാരണം ജാതിവ്യവസ്ഥ തന്നെയാണ്. ആയിരത്താണ്ടുകളായി ജാതിവ്യവസ്ഥ മൂലം അടിച്ചമര്ത്തപ്പെട്ട ജനതയായി ഇന്നും കഴിയുന്ന അധ:സ്ഥിത പിന്നോക്ക ജനവിഭാഗങ്ങളാണ് വാസ്തവത്തില് ഹിന്ദുമതത്തെയും ക്ഷേത്രങ്ങളെയും നിലനിര്ത്തി പോരുന്നതെന്ന് കാണാനാകും. ക്ഷേത്രങ്ങളില് ലഭിക്കുന്ന സംഭാവനകളില് മുഖ്യഭാഗവും പിന്നോക്കക്കാരുടേതാണ്. സവര്ണ്ണ ജനവിഭാഗങ്ങള് ക്ഷേത്രങ്ങളില് നിന്നും പൂജാദികളില് നിന്നുമെല്ലാം അകറ്റിനിര്ത്തിയിട്ടും അവര് ഇപ്പോഴും ഹിന്ദുമത വിശ്വാസികളായി തുടരുന്നു. സഹിക്കവയ്യാതെ മതപരിവര്ത്തനം ചെയ്യപ്പെട്ടവരെ കുറിച്ച് ഇവിടെ പറയുന്നില്ല. അതിനെക്കുറിച്ച് ഏവരും ചിന്തിക്കുന്നത് നന്നായിരിക്കും.
ക്ഷേത്രത്തിലെ പൂജാദി കര്മ്മങ്ങളും ഭരണവും ഹിന്ദു സമുദായത്തിലെ കേവലം ന്യൂനപക്ഷമായ സവര്ണ്ണ ജനവിഭാഗങ്ങള് കുത്തകയാക്കി വെച്ചിരിക്കുന്നതിന് യാതൊരു ന്യായീകരണവും പറയാനാകില്ല. ശബരിമലയിലെ സ്വര്ണ്ണ പാളികളും ഭഗവാന്റെ യോഗദണ്ഡും കട്ടിളയും വരെ മോഷണം പോയതില് തന്ത്രിമാര്ക്കും അവിടുള്ള നിരവധി വൈദികര്ക്കും ഉത്തരവാദിത്വമില്ലേ? ക്ഷേത്രത്തില് എല്ലാറ്റിനും അന്ത്യ വാക്ക് തന്ത്രിമാര് എന്ന ധാരണ തിരുത്തപ്പെടേണ്ടതു തന്നെയാണ്.
ശബരിമല, മലബാര് ക്ഷേത്രങ്ങളിലെ മോഷണ സംഭവങ്ങള് തെളിയിക്കുന്നത്.ക്ഷേത്ര ഭരണവും പൂജാകര്മ്മങ്ങളും കുറേക്കൂടി സുതാര്യമാക്കിയിരുന്നെങ്കില് ഇത്തരം സംഭവങ്ങള് നടക്കുമായിരുന്നില്ല. സ്ത്രീ പ്രവേശനം പാടില്ല എന്നതില് മാത്രമാണോ ഇന്നത്തെ ദേവസ്വം ബോര്ഡിന്റെ ശ്രദ്ധ. അധസ്ഥിത പിന്നോക്ക ജനവിഭാഗങ്ങള്ക്ക് കൂടി ക്ഷേത്ര ഭരണത്തിലും പൂജയിലും പങ്കാളിത്തം ഉണ്ടായിരുന്നുവെങ്കില് ശബരിമലയിലെയും മറ്റു ദേവസ്വം ബോര്ഡ് ക്ഷേത്രങ്ങളിലെയും തീവെട്ടികൊള്ള നടക്കുമായിരുന്നില്ല.
ഗുരുദേവനാല് സ്ഥാപിച്ച ക്ഷേത്രങ്ങളില് ഒരു പരിധിവരെ എങ്കിലും പരിരക്ഷിക്കപ്പെടുന്നു എന്ന സത്യവും നാം കാണണം. പ്രബുദ്ധരായ സനാതന ധര്മ്മ വിശ്വാസികള് ഇതിനെപ്പറ്റി ആഴത്തില് ചിന്തിക്കണമെന്ന് സാദരം അഭ്യര്ത്ഥിച്ചുകൊള്ളുന്നു.
