തിരുവനന്തപുരം: കേരളത്തിൽ ഇടിമിന്നലോടു കൂടിയ മഴക്ക് വിവിധ ജില്ലകളിൽ സാധ്യതയെന്ന് മെറ്റാബീറ്റ് വെതർ റിപ്പോർട്ട് ചെയ്യുന്നു. കന്യാകുമാരിക്കു മുകളിൽ സമുദ്ര നിരപ്പിൽ നിന്ന് 1.5 കി.മി ഉയരത്തിൽ രൂപം കൊണ്ട അന്തരീക്ഷച്ചുഴി തെക്കൻ ജില്ലകളിൽ മഴയ്ക്ക് കാരണമായേക്കും. കേരളത്തിൽ ഇന്നു മുതൽ ഇടിയോടെ മഴ സാധ്യതയുണ്ടെന്ന് കഴിഞ്ഞ ദിവസം മെറ്റ്ബീറ്റ് വെതർ റിപ്പോർട്ടു ചെയ്തിരുന്നു.
വടക്കൻ ബംഗാൾ ഉൾക്കടലിനു മുകളിൽ ഒക്ടോബർ 10 ന് മറ്റൊരു അന്തരീക്ഷച്ചുഴി രൂപം കൊള്ളാനും സാധ്യതയുണ്ട്. ഇന്നു മുതൽ അടുത്ത മൂന്നുദിവസം കേരളം, തമിഴ്നാട്, കർണാടക സംസ്ഥാനങ്ങളിൽ ഇടിയോടെ മഴ തുടരാനാണ് സാധ്യത. വടക്കൻ കേരളത്തിലും മഴ ലഭിക്കും. കേരളത്തിൽ വരുന്ന അഞ്ചു ദിവസവും മഴ സാധ്യതയുണ്ടെന്നാണ് റിപ്പോർട്ട്.
കേരളത്തിൽ പകൽ, രാത്രി താപനില സാധാരണ നിലയിൽ തുടരും. കേരളത്തിൽ ഇന്ന് ആറു ജില്ലകളിൽ കാലാവസ്ഥാ വകുപ്പ് ഇടിയോടെ മഴ സാധ്യതയെ തുടർന്ന് മഞ്ഞ അലർട്ട് പ്രഖ്യാപിച്ചിരുന്നു. കൊല്ലം, പത്തനംതിട്ട, കോട്ടയം, ഇടുക്കി, കോഴിക്കോട്, വയനാട് ജില്ലകളിലാണ് മഞ്ഞ അലർട്ട് പ്രഖ്യാപിച്ചത്. നാളെ പത്തനംതിട്ട, ഇടുക്കി, പാലക്കാട്, മലപ്പുറം, ജില്ലകളിലും മഞ്ഞ അലർട്ട് പ്രഖ്യാപിച്ചിട്ടുണ്ട്.
