തിരുവനന്തപുരം: ഉയരം കുറഞ്ഞ ആളുകളെ കേരളത്തിലെ മുഖ്യമന്ത്രിക്ക് പുച്ഛമാണോ? നിയമസഭയില് മുഖ്യമന്ത്രി നടത്തിയ എട്ടുമുക്കാല് അട്ടി വച്ചതു പോലെ പൊക്കം കുറഞ്ഞ ഒരാളാണ് തള്ളിക്കയറിയതെന്ന പരാമര്ശത്തില് പ്രതിഷേധിച്ച് പ്രതിപക്ഷ നേതാവ്. പ്രതിപക്ഷ അംഗത്തിന്റെ ഉയര കുറവിനോട് മുഖ്യമന്ത്രി നടത്തിയത് ബോഡി ഷെയ്മിങാണെന്നും പരാമര്ശം പിന്വലിച്ച് മാപ്പ് പറയണമെന്നും സെക്രട്ടേറിയേറ്റിന് മുന്നില് നടത്തിയ പ്രതിഷേധസമരത്തില് വി ഡി സതീശന് ആവശ്യപ്പെട്ടു.
കണ്ണൂരില് പറഞ്ഞു കേള്ക്കുന്നതു പോലെ എട്ടുമുക്കാല് അട്ടി വച്ചതു പോലെ പൊക്കം കുറഞ്ഞ ഒരാളാണ് തള്ളിക്കയറിയതെന്നും അയാള്ക്ക് ആരോഗ്യം ഇല്ലെന്നും നിയമസഭയുടെ പ്രിവിലേജ് ഉപയോഗിച്ചാണ് അങ്ങനെ ചെയ്തതെന്നുമാണ് മുഖ്യമന്ത്രി പറഞ്ഞത്. ഇത് ബോഡി ഷെയ്മിങാണ്. പൊളിറ്റിക്കലി ഇന്കറക്ടായ വാചകമാണ് മുഖ്യമന്ത്രി പറഞ്ഞത്. ഈ പരാമര്ശം പിന്വലിച്ച് മാപ്പ് പറയാന് തയാറാകണം.
പാര്ലമെന്ററി കാര്യമന്ത്രി എം ബി രാജേഷ്, ഉമാ തോമസിന്റെ രോഗത്തെ കുറിച്ചും ആരോഗ്യാവസ്ഥയെ കുറിച്ചും പരാമര്ശിച്ചിരുന്നു. ഉമാ തോമസിനെ കവചമാക്കിയാണ് പ്രതിപക്ഷം പ്രതിഷേധിക്കുന്നതെന്നാണ് മന്ത്രി പറഞ്ഞത്. അതും പിന്വലിക്കണം. ഉമ തോമസിന്റെ ആരോഗ്യത്തെ കുറിച്ച് എം ബി രാജേഷ് ഉത്കണ്ഠപ്പെടേണ്ട. മുഖ്യമന്ത്രിയും പാര്ലമെന്ററികാര്യ മന്ത്രിയും പറഞ്ഞത് തെറ്റാണ്. ഇവരൊക്കെ ഏത് നൂറ്റാണ്ടിലാണ് ജീവിക്കുന്നത്? പുരോഗമന വാദികളാണെന്നു പറയുന്നവര് വായ് തുറന്നാല് ഇതുപോലുള്ള വര്ത്തമാനമാണ് പറയുന്നതെന്നും സതീശന് ചൂണ്ടിക്കാട്ടി.
