തിരുവനന്തപുരം : ടിക്കറ്റ് വരുമാനത്തില് കെഎസ്ആര്ടിസിക്ക് ചരിത്രത്തിലെ ഉയര്ന്ന രണ്ടാമത്തെ പ്രതിദിന കളക്ഷന്. തിങ്കളാഴ്ച(ഒക്ടോബര് 6) കെഎസ്ആര്ടിസി ടിക്കറ്റ് വില്പ്പനയിലൂടെ നേടിയത് 9.41 കോടി രൂപയാണ്. 2025 സെപ്തംബര് എട്ടിന് നേടിയ 10.19 കോടി രൂപയാണ് കെഎസ്ആര്ടിസിയുടെ ചരിത്രത്തിലെ ഏറ്റവും ഉയര്ന്ന കളക്ഷന്. ഡിസംബര് 23ന് കെഎസ്ആര്ടിസി നേടിയ പ്രതിദിന ടിക്കറ്റ് വരുമാനമായ 9.22 കോടി രൂപയെയാണ് ഇക്കഴിഞ്ഞ തിങ്കളാഴ്ചത്തെ പ്രതിദിന വരുമാനം മറികടന്നിരിക്കുന്നത്.
യാത്രക്കാരോട് ഗതാഗതവകുപ്പ് മന്ത്രി കെ ബി ഗണേഷ് കുമാര് നന്ദി അറിയിച്ചു.റെക്കോര്ഡ് നേട്ടത്തിനായി പരിശ്രമിച്ച എല്ലാ കെഎസ്ആര്ടിസി ജീവനക്കാരെയും മന്ത്രി അഭിനന്ദിച്ചു. ലക്ഷ്യമിട്ട വരുമാനത്തേക്കാള് പ്രതിദിന കളക്ഷന് ഉയര്ന്നത് അഭിമാനകരമാണെന്ന് ഗണേഷ് കുമാര് പറഞ്ഞു.വരുമാനത്തില് ഏകദേശം 104 ശതമാനം വരെ വര്ധനവുണ്ടായി.
ജീവനക്കാരുടെ ശമ്പളവിതരണം ഉള്പ്പെടെ വൈകിയിരുന്ന പ്രതിസന്ധി ഘട്ടത്തെ മറികടന്ന് കെഎസ്ആര്ടിസി വളരുന്നുവെന്നതിന്റെ സൂചനയാണ് ടിക്കറ്റ് വരുമാനത്തിലുണ്ടാകുന്ന വര്ധന. പുതിയ റൂട്ടുകള്, കൂടുതല് ദീര്ഘദൂര സര്വീസുകള്, പുതിയ ബസുകള്, ട്രാവര് കാര്ഡ്, യുപിഐ വഴി പണമടക്കാനുള്ള സംവിധാനം, കൊറിയര് സര്വീസ്, ബസ് ലൈവ് ട്രാക്കിംഗ്, എക്സോ, ബഡ്ജറ്റ് ടൂറിസം പാക്കേജുകള് മുതലായവ കെഎസ്ആര്ടിസിയുടെ ജനപ്രീതി വര്ധിപ്പിച്ചിട്ടുണ്ടെന്നാണ് വിലയിരുത്തല്.
