തിരുവനന്തപുരം: ശബരിമലയിലെ സ്വര്ണപ്പാളിയുമായി ബന്ധപ്പെട്ട് വിവാദ നായകനായ ഉണ്ണികൃഷ്ണന് പോറ്റിയുമായി തിരുവിതാംകൂര് ദേവസ്വം ബോര്ഡ് അംഗമായ സിപിഐ നേതാവ് എ അജികുമാറിന് അടുത്ത ബന്ധമെന്ന് ആരോപണം. അജികുമാറിന്റെ കുടുംബക്ഷേത്രത്തിന്റെ പേരില് ഉണ്ണികൃഷ്ണന് പോറ്റി രണ്ട് പേര്ക്ക് വീട് നിര്മിച്ചു നല്കിയെന്നാണ് വാര്ത്ത.
കായംകുളം അറയ്ക്കല് അന്നപൂര്ണേശ്വരി ക്ഷേത്രത്തിലാണ് ഉണ്ണികൃഷ്ണന് പോറ്റിയെ സ്പോണ്സര് ആയി അജികുമാര് എത്തിച്ചത്. ബെംഗളൂരു സ്വദേശികളായ മൂന്ന് അയ്യപ്പ ഭക്തര് നിര്മിച്ചു നല്കുന്ന വീട് എന്നാണ് നോട്ടീസില് ഉണ്ടായിരുന്നത്. രാഘവേന്ദ്ര, രമേശ് എന്നിവര്ക്കൊപ്പം ഉണ്ണികൃഷ്ണന് പോറ്റിയുടെ പേരുമുണ്ടായിരുന്നു. അറയ്ക്കല് അന്നപൂര്ണേശ്വരി ക്ഷേത്ര പരിസരത്ത് വെച്ച് മേയ് 25 നാണ് താക്കോല് ദാന ചടങ്ങ് നടന്നത്.
ചടങ്ങില് ഉണ്ണികൃഷ്ണന് പോറ്റിയെ പൊന്നാട അണിയിച്ച് ആദരിച്ചതിന്റെ ചിത്രങ്ങള് പുറത്തു വന്നു. ഉണ്ണികൃഷ്ണന് പോറ്റിയെ അറിയില്ലെന്ന് പറഞ്ഞ ക്ഷേത്ര ഭാരവാഹികള് അജികുമാര് ആണ് പോറ്റിയെ എത്തിച്ചതെന്നും വീടിന് അര്ഹരായവരെ കണ്ടെത്തുക മാത്രമാണ് തങ്ങള് ചെയ്തതെന്നും വെളിപ്പെടുത്തി.
കായംകുളത്തെ സിപിഐ നേതാവായ അജികുമാറിനെതിരെ അനധികൃത സ്വത്ത് സമ്പാദന പരാതി ഉയര്ന്നതിനെ തുടര്ന്ന് സിപിഐ ജില്ലാ കമ്മിറ്റിയില് നിന്ന് തരം താഴ്ത്തിയിരുന്നു. ഈ വിധം പാര്ട്ടി നടപടി നേരിട്ടയാള് കൂടിയാണ് തിരുവിതാംകൂര് ദേവസ്വം ബോര്ഡ് അംഗം അജികുമാര്.
എന്നാല് ആരോപണങ്ങള് അജികുമാര് നിഷേധിച്ചു. ക്ഷേത്രത്തിലെ ഉപദേശക സമിതി അംഗം ബിനുവാണ് ബെംഗളൂരുവിലുള്ളവരെ പരിചയപ്പെടുത്തിയത്. നിരാലംബരായ രണ്ടുപേര്ക്ക് വീട് കിട്ടിയപ്പോള് സന്തോഷിച്ചുവെന്നും അതെല്ലാം ഇങ്ങനെയാകുമെന്ന് കരുതിയില്ലെന്നും അജികുമാര് പറഞ്ഞു. എല്ലാവരുടെയും പൊലീസ് സര്ട്ടിഫിക്കറ്റ് വാങ്ങി സംസാരിക്കാന് പറ്റുമോയെന്നും അദ്ദേഹം ചോദിച്ചു. താന് ആരെയും യോഗത്തിലേക്ക് ക്ഷണിച്ചിട്ടില്ല. ഉണ്ണികൃഷ്ണന് പോറ്റിയെ താനല്ല യോഗത്തിലേക്ക് ക്ഷണിച്ചതെന്നും എംഎല്എയും ഡിവൈഎസ്പിയുമൊക്കെ യോഗത്തില് പങ്കെടുത്തുവെന്നും അജികുമാര് പറഞ്ഞു.പാര്ട്ടി തന്നോട് വിശദീകരണം തേടിയിട്ടില്ല.
