തിരുവനന്തപുരം : ഡിജിറ്റല്,സാങ്കേതിക സര്വകലാശാല വി സി നിയമനത്തിനുള്ള അഭിമുഖം ഈ മാസം 8 മുതല് 12 വരെ നടക്കും. തിരുവനന്തപുരത്ത് മസ്കറ്റ് ഹോട്ടലിലാണ് അഭിമുഖം നടക്കുക.
ഉന്നത വിദ്യാഭ്യാസ വകുപ്പാണ് വി സി നിയമത്തിനുള്ള അപേക്ഷകള് സ്വീകരിച്ചത്.60 ഓളം അപേക്ഷകര്ക്ക് ഇന്റര്വ്യൂവില് പങ്കെടുക്കാനുളള അറിയിപ്പ് നല്കി.ഒക്ടോബര് 8, 9 തീയതികളില് സാങ്കേതിക സര്വകലാശാല വിസി നിയമനത്തിനുള്ള അഭിമുഖം നടക്കും. 10,11 തീയതികളില് ഡിജിറ്റല് സര്വകലാശാല വിസി നിയമനത്തിനുള്ള അഭിമുഖവും നടക്കും.
സുപ്രീംകോടതി ചുമതലപ്പെടുത്തിയ റിട്ട. ജസ്റ്റിസ് സുധാംഷൂ ധൂലിയയാണ് സെര്ച്ച് കമ്മിറ്റി അധ്യക്ഷന്. ഗവര്ണറും സര്ക്കാരും നിര്ദ്ദേശിച്ച നാലുപേര് വീതമാണ് രണ്ട് സെര്ച്ച് കമ്മിറ്റികളിലെ അംഗങ്ങള്. സംസ്ഥാനത്തിന് പുറത്തുള്ളവരാണ് കമ്മിറ്റി അംഗങ്ങള്. സുപ്രീം കോടതി ഉത്തരവ് പ്രകാരം മൂന്ന് അംഗ പാനലാണ് മുഖ്യമന്ത്രിക്ക് സമര്പ്പിക്കേണ്ടത്.
മുഖ്യമന്ത്രി നിയമനത്തിനുള്ള മുന്ഗണന പട്ടിക നിശ്ചയിക്കും. മുന്ഗണന പ്രകാരം നിയമിക്കുവാനുള്ള അധികാരമാണ് ഗവണര്ക്കുള്ളത്. മുഖ്യമന്ത്രി നിശ്ചയിക്കുന്ന മുന്ഗണന പട്ടികയില് മാറ്റം വരുത്തുന്നുവെങ്കില് അതിന് വ്യക്തമായ കാരണം ഗവര്ണര് ബോധിപ്പിക്കണം.അക്കാര്യത്തില് സര്ക്കാരിന് പരാതിയുണ്ടെങ്കില് സുപ്രീംകോടതിയെ സമീപിക്കാമെന്നുംസുപ്രീംകോടതി ഉത്തരവില് പറയുന്നുണ്ട്.
യുജിസി റെഗുലേഷന് വിരുദ്ധമായി യുജിസി പ്രതിനിധിയെ ഒഴിവാക്കി വി സി നിയമനം നടത്തുവാനുള്ള സുപ്രീംകോടതി ഉത്തരവിനെതിരെ ഗവര്ണര് ഫയല് ചെയ്ത റിവ്യൂ ഹര്ജിയില് കക്ഷി ചേരാന് യുജിസി സുപ്രീംകോടതിയില് അപേക്ഷ സമര്പ്പിച്ചിട്ടുണ്ട്.
