തിരുവനന്തപുരം: കോവളത്ത് രാസലഹരിയുമായി സഹോദരങ്ങള് പിടിയിലായി. 190 ഗ്രാം എംഡിഎംഎ ഇവരിൽ നിന്നും പിടികൂടി. കാറില് യാത്രചെയ്യുന്നതിനിടെ കോവളത്തുവെച്ചാണ് പോലീസും ഡാന്സാഫ് സംഘവും ഇരുവരെയും കസ്റ്റഡിയിലെടുത്തത്. ചെമ്പഴന്തി സ്വദേശി സാബു (36), ചെല്ലമംഗലം സ്വദേശി രമ്യ (36) എന്നിവരാണ് പിടിയിലായത്.
രഹസ്യ വിവരത്തെ തുടർന്നു സിറ്റി ഡാൻസാഫ് ടീം ഇവരെ പിടിയിലാക്കുകയായിരുന്നു. വിവരം കിട്ടിയതിന്റെ അടിസ്ഥാനത്തിൽ കോവളം ജംഗ്ഷനില് തിരുവനന്തപുരം സിറ്റി ഡാൻസാഫ് സംഘം വാഹന പരിശോധന നടത്തുകയായിരുന്നു. കോവളത്തും പരിസര പ്രദേശങ്ങളിലുമായി ചില്ലറ വിൽപ്പനയ്ക്കായാണ് ഇവര് എംഡിഎംഎ എത്തിച്ചിരുന്നത്. കഴിഞ്ഞ കുറച്ച് ദിവസങ്ങളായി തന്നെ ഇരുവരെയും ഡാൻസാഫ് സംഘം നിരീക്ഷിച്ചുവരികയായിരുന്നു.
