തിരുവനന്തപുരം: ചലച്ചിത്രരംഗത്തെ പരമോന്നത ദേശീയ ബഹുമതിയായ ദാദാ സാഹേബ് ഫാല്ക്കെ പുരസ്കാരം നേടിയ നടന് മോഹന്ലാലിന് ആയിരങ്ങളെ സാക്ഷിയാക്കി ആദരമര്പ്പിച്ച് സംസ്ഥാന സര്ക്കാര്. സെന്ട്രല് സ്റ്റേഡിയത്തില് സംഘടിപ്പിച്ച ‘മലയാളം വാനോളം ലാല്സലാം’ എന്ന പരിപാടിയില് മുഖ്യമന്ത്രി പിണറായി വിജയന് മോഹന്ലാലിനെ പൊന്നാട അണിയിച്ച് ആദരിച്ചു.
മോഹന്ലാല് ചിത്രങ്ങളിലെ ദൃശ്യങ്ങള് ഉള്പ്പെടുത്തി കേരള ആര്ട്ട്സ് ആന്ഡ് ക്രാഫ്റ്റ്സ് വില്ലേജ് തയാറാക്കിയ ശില്പവും സംസ്ഥാന സര്ക്കാരിനുവേണ്ടി കവി പ്രഭാവര്മ്മ തയാറാക്കിയ പ്രശസ്തിപത്രവും കൈമാറി. ഗായിക ലക്ഷ്മിദാസ് പ്രശസ്തിപത്രം ആലപിച്ചു. ചിത്രകാരന് എ. രാമചന്ദ്രന്റെ താമരക്കുളത്തിന്റെ ലോകം എന്ന ചിത്രവും മോഹന്ലാലിന് മുഖ്യമന്ത്രി സമ്മാനിച്ചു.
വേദിയില് മോഹന്ലാല് എത്തിയപ്പോഴും മറുപടി പ്രസംഗം നടത്തിയപ്പോഴും സദസില് ആര്പ്പുവിളികളുയര്ന്നു. അസാമാന്യ മെയ്വഴക്കവും അഭിനയശേഷിയുമുള്ള ആളാണ് മോഹന്ലാലെന്ന് മുഖ്യമന്ത്രി പറഞ്ഞു.
ഒരേസമയം നല്ല നടനും ജനപ്രിയ നടനും ആവുക അത്ര എളുപ്പമല്ല. മോഹന്ലാല് മലയാളത്തിന്റെ ഇതിഹാസ താരമാണ്. ശതാബ്ദിയോട് അടുക്കുന്ന മലയാള സിനിമയില് അര നൂറ്റാണ്ടായി മോഹന്ലാലുണ്ട്. നടപ്പിലും ഇരിപ്പിലും നോട്ടത്തിലും ശരീരഭാഷയിലും ഇത്രത്തോളം മലയാളിയെ സ്വാധീനിച്ച അധികം താരങ്ങളില്ല. പ്രായഭേദമന്യെ മലയാളികള് ലാലേട്ടനെന്നാണ് വിളിക്കുന്നത്. നമ്മുടെ വീട്ടിലെ ഒരംഗമായി, അല്ലെങ്കില് തൊട്ടയല്പക്കത്തെ പ്രിയപ്പെട്ട ഒരാളായി മോഹന്ലാലിനെ മലയാളികള് കാണുന്നു. സ്ക്രീനിലും സ്ക്രീനിനു പുറത്തും ആ സ്നേഹവും ആദരവും മലയാളികള് മോഹന്ലാലിന് നല്കിപ്പോരുന്നു. ഇന്നത്തെ യുവനടന്മാര് ഒരു വര്ഷത്തില് മൂന്നോ നാലോ സിനിമകളില് മാത്രം അഭിനയിക്കുന്നു, എന്നാല് മോഹന്ലാല് ഒരു വര്ഷം 34 സിനിമയില് വരെ അഭിനയിച്ചിട്ടുണ്ടെന്നും മുഖ്യമന്ത്രി പറഞ്ഞു.
ഭരത് മോഹന്ലാലിലൂടെ വാനോളമാണ് മലയാളം ഉയര്ന്നതെന്നും അതുകൊണ്ടാണ് സിനിമയ്ക്കുള്ള സമഗ്ര സംഭാവനക്ക് രാജ്യത്തെ പരമോന്നത ബഹുമതിയായ ദാദാ സാഹേബ് ഫാല്ക്കെ അവാര്ഡ് നേടിയ മോഹന്ലാലിനോട് കേരളം ഒന്നടങ്കം ലാല്സലാം എന്ന് പറയുന്നതെന്നും മന്ത്രി സജി ചെറിയാന് പറഞ്ഞു.
മന്ത്രി വി. ശിവന്കുട്ടി അധ്യക്ഷനായി. മന്ത്രിമാരായ കെ.എന്. ബാലഗോപാല്, ജി.ആര്. അനില്, സംവിധായകന് അടൂര് ഗോപാലകൃഷ്ണന്, നടി അംബിക തുടങ്ങിയവര് സംസാരിച്ചു. നടന് ജഗതിശ്രീകുമാര്, സംവിധായകന് ജോഷി, നടിമാരായ രഞ്ജിനി, മാളവികാമോഹനന്, പ്രേംകുമാര് തുടങ്ങി സിനിമാ താരങ്ങളും ജനപ്രതിനിധികളും രാഷ്ട്രീയ മേഖലയിലെ പ്രമുഖരും ഉള്പ്പെടെ ആയിരക്കണക്കിനാളുകള് പങ്കെടുത്തു. ശ്രാവണയുടെ സോളോ വയലിന് പ്രകടനത്തോടെയാണ് പരിപാടി തുടങ്ങിയത്.
ഉദ്ഘാടന ചടങ്ങുകള്ക്ക് ശേഷം ടി.കെ. രാജീവ്കുമാര് സംവിധാനം ചെയ്ത പ്രത്യേക കലാവിരുന്ന് രാഗമോഹനം, മോഹന്ലാലിന്റെ നടനചാതുര്യത്തിന് സമര്പ്പണമായി കഥകളി ആചാര്യന് കലാമണ്ഡലം ബാലസുബ്രഹ്മണ്യന് ആശാന്റെ തിരനോട്ടം എന്നിവയും അരങ്ങേറി. മോഹന്ലാല് ചിത്രങ്ങളിലെ ഗാനങ്ങള് കോര്ത്തിണക്കി പിന്നണി ഗായകരുടെ സംഗീതാര്ച്ചനയും ഉണ്ടായി. പൊതുജനങ്ങള്ക്ക് സൗജന്യമായി പ്രവേശനം അനുവദിച്ചിരുന്നതിനാല് ഗതാഗതക്കുരുക്ക് ഒഴിവാക്കാന് ഉച്ചയ്ക്ക് 3 മണി മുതല് നഗരത്തില് ഗതാഗത നിയന്ത്രണവും ഏര്പ്പെടുത്തിയിരുന്നു.
