ന്യൂദല്ഹി: വഖഫ് ഭേദഗതി നിയമം സ്റ്റേ ചെയ്യാനുള്ള ഇന്ഡി സഖ്യത്തിലെ പാര്ട്ടികളായ കോണ്ഗ്രസിന്റെയും സിപിഎമ്മിന്റെയും ശ്രമങ്ങള് സുപ്രീംകോടതി തള്ളിക്കളഞ്ഞ സാഹചര്യത്തില്, മുനമ്പം ജനതയുടെ മുന്നോട്ടുള്ള കാര്യങ്ങള് ചര്ച്ച ചെയ്യുന്നതിനായി ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് കേന്ദ്ര ന്യൂനപക്ഷകാര്യ മന്ത്രി കിരണ് റിജിജുവുമായി കൂടിക്കാഴ്ച നടത്തി.
കേരളത്തിന്റെയും മലയാളികളുടെയും പ്രശ്നങ്ങളില് എല്ലായ്പ്പോഴും പ്രതിബദ്ധതയുള്ള വ്യക്തിയാണ് കിരണ് റിജിജുവെന്ന് രാജീവ് ചന്ദ്രശേഖര് പറഞ്ഞു. മുന് സര്ക്കാരുകള്ക്ക് പരിഹരിക്കാന് കഴിയാതിരുന്നതോ അല്ലെങ്കില് പരിഹരിക്കാന് തയാറാവാതിരുന്നതോ ആയ ജനങ്ങളുടെ ദീര്ഘകാലമായുള്ള പ്രശ്നങ്ങള്ക്ക് ദൃഢനിശ്ചയത്തോടെ പരിഹാരം കാണുന്ന ഒരു സര്ക്കാരാണ് പ്രധാനമന്ത്രി നരേന്ദ്ര മോദിയുടേതെന്നും അദ്ദേഹം കൂട്ടിച്ചേര്ത്തു.
