ലഖ്നൗ : ബറേലിയിലെ മതമൗലികവാദികളുടെ കലാപത്തിനു ശേഷം ശനിയാഴ്ച ബറേലി മുനിസിപ്പൽ കോർപ്പറേഷൻ കയ്യേറ്റ വിരുദ്ധ നീക്കം ആരംഭിച്ചു. കോർപ്പറേഷൻ സംഘം മുസ്ലീങ്ങളുടെ നിരവധി അനധികൃത കയ്യേറ്റങ്ങൾ ബുൾഡോസർ ഉപയോഗിച്ച് നീക്കം ചെയ്തു.
ബറേലിയിലെ ബരാദാരി പോലീസ് സ്റ്റേഷൻ പ്രദേശത്തെ സൈലാനി ബസാറിലെ കയ്യേറ്റങ്ങളാണ് മുനിസിപ്പൽ കോർപ്പറേഷൻ ബുൾഡോസർ ഉപയോഗിച്ച് പൊളിച്ചുമാറ്റിയത്. ഈ സമയത്ത് ധാരാളം പോലീസുകാരെ ഇവിടെ വിന്യസിച്ചു. ഒരേസമയം നാല് ബുൾഡോസറുകൾ ഉപയോഗിച്ചാണ് കയ്യേറ്റങ്ങൾ നീക്കം ചെയ്തത്.
ഇതേസമയം സ്ഥലത്തെത്താൻ ശ്രമിക്കുകയായിരുന്ന സമാജ്വാദി പാർട്ടി എംപി നീരജ് മൗര്യയെ ആൻലയിൽ വെച്ച് പോലീസ് കസ്റ്റഡിയിലെടുത്തു. എസ്പി എംപി നീരജ് മൗര്യ ഒരു മുസ്ലീം കുടുംബത്തെ കാണാൻ പോകുകയായിരുന്നു. കൂടാതെ സമാജ്വാദി പാർട്ടി ജില്ലാ പ്രസിഡൻ്റ് ശിവചരൺ കശ്യപിനെയും വീട്ടുതടങ്കലിലാക്കി. ഇരുവരും പ്രദേശത്തെത്തിയാൽ കൂടുതൽ അക്രമങ്ങൾ പൊട്ടിപ്പുറപ്പെടാനുള്ള സാഹചര്യം കണക്കിലെടുത്താണ് നടപടി.
അതേ സമയം നിരപരാധികളായ മുസ്ലീങ്ങളെ ജയിലിലേക്ക് അയയ്ക്കുകയാണെന്ന് നീരജ് മൗര്യ ആരോപിച്ചു. മുസ്ലീങ്ങളോട് അനീതിയാണ് കാണിക്കുന്നതെന്നും കലാപത്തിൽ ഉൾപ്പെടാത്തവരെ പോലും ജയിലിലേക്ക് അയയ്ക്കുന്നുണ്ടെന്നും എംപി നീരജ് മൗര്യ പറഞ്ഞു.
എന്നാൽ ബറേലി ഡെവലപ്മെന്റ് അതോറിറ്റി നിയമങ്ങൾക്കനുസൃതമായിട്ടാണ് നടപടികൾ സ്വീകരിക്കുന്നതെന്ന് അധികൃതർ അറിയിച്ചു. അനധികൃതമായി നിർമ്മിച്ച കെട്ടിടങ്ങളാണ് പൊളിച്ച് നീക്കുന്നതെന്നും ഉദ്യോഗസ്ഥർ പറഞ്ഞു.
കൂടാതെ സുരക്ഷയും സമാധാനവും നിലനിർത്തുന്നതിനുള്ള മുൻകരുതൽ നടപടിയായാണ് ഇവിടെ പോലീസ് സേനയെ വിന്യസിച്ചിരിക്കുന്നത്. ഈ നടപടി പൂർണ്ണമായും സ്വതന്ത്രവും വികസന അതോറിറ്റി തന്നെയാണ് നടത്തുന്നതെന്നും ബറേലി സിറ്റി എസ്പി മനുഷ് പരീഖ് പറഞ്ഞു.
