തിരുവനന്തപുരം: മോഹന്ലാലിനോടൊപ്പം പ്രവര്ത്തിക്കാന് എനിക്ക് ഇനിയും അവസരം കിട്ടിയിട്ടില്ലെന്നും എന്നാല് അദ്ദേഹത്തിന്റെ കഴിവുകളെപ്പറ്റി അങ്ങേയറ്റം അഭിമാനിക്കുകയും അതിനെ ആദരിക്കുകയും ചെയ്യുന്നതായും ഫാല്ക്കെ പുരസ്കാരം നേടിയ ആദ്യ മലയാളിയാം സംവിധായകനുമായ അടൂര് ഗോപാലകൃഷ്ണന് പറഞ്ഞു. മലയാളത്തിന്റെ വലുപ്പത്തെ ലോകത്തിന് മുന്നില് പ്രതിനിധീകരിക്കുന്ന വ്യക്തിത്വമാണ് മോഹന്ലാല്. മോഹന്ലാലിനെ ആദരിക്കുന്ന ‘മലയാളം വാനോളം ലാല്സലാം’ പരിപാടിയില് ആശംസകള് അര്പ്പിക്കുകയായിരുന്നു അടൂര് ഗോപാലകൃഷ്ണന്.
മോഹന്ലാലിന് ആദ്യ ദേശീയ പുരസ്ക്കാരം ലഭിക്കുന്നതിന്റെ ജൂറി ചെയര്മാനായിരുന്നു താനെന്ന് അദ്ദേഹം ഓര്മിച്ചു. മോഹന്ലാലിന് ദേശീയ തലത്തിലുള്ള ബഹുമതികള് ലഭിച്ചു തുടങ്ങുന്നത് അവിടെ നിന്നാണ്. മോഹന്ലാലിന് ദാദാസാഹേബ് ഫാല്ക്കെ പുരസ്ക്കാരം ലഭിച്ചതിന്റെ ഭാഗമായി സംസ്ഥാന സര്ക്കാരിന്റെ ആഭിമുഖ്യത്തില് കേരളം അദ്ദേഹത്തെ ആദരിക്കുന്നു എന്നതില് സന്തോഷവും അഭിമാനവുമുണ്ട്. ഓരോ മലയാളിക്കും തങ്ങളുടെ പ്രതിബിംബം മോഹന്ലാലില് കാണാനാകും. അതിനാലാണ് ലോകത്ത് എവിടെ ജീവിക്കുന്ന മലയാളികളുടെയും സ്നേഹപാത്രമാകാന് അദ്ദേഹത്തിന് കഴിഞ്ഞത്. മോഹന്ലാലിന് കൂടുതല് അഭിനയജീവിതവും വിജയങ്ങളും ഉണ്ടാവട്ടെ എന്ന് അദ്ദേഹം ആശംസിച്ചു.
