ന്യൂദൽഹി : നാഷണൽ ക്രൈം റെക്കോർഡ്സ് ബ്യൂറോയുടെ (എൻസിആർബി) “ഇന്ത്യയിലെ കുറ്റകൃത്യങ്ങൾ 2023” റിപ്പോർട്ടിൽ ഉത്തർപ്രദേശിലെ യോഗി ആദിത്യനാഥ് സർക്കാരിന് പ്രശംസ. യോഗി ഭരണത്തിന് കീഴിൽ ക്രമസമാധാന നില ഏറെ മെച്ചപ്പെട്ടതായിട്ടാണ് റിപ്പോർട്ട് സൂചിപ്പിക്കുന്നത്.
എൻസിആർബി ഡാറ്റ പ്രകാരം, 2023 ൽ ഉത്തർപ്രദേശിൽ വർഗീയവും മതപരവുമായ കലാപങ്ങൾ പൂജ്യമായിരുന്നു. യോഗിക്ക് മുമ്പ് ഉത്തർപ്രദേശിൽ ഇത് ഒരിക്കലും സംഭവിച്ചിട്ടില്ല. കൂടാതെ ഉത്തർപ്രദേശിലെ കുറ്റകൃത്യങ്ങൾ ദേശീയ ശരാശരിയേക്കാൾ കാൽ ശതമാനം കുറവാണ്. അതായത് രാജ്യത്തെ ഏറ്റവും വലിയ സംസ്ഥാനത്തെ മൊത്തത്തിലുള്ള കുറ്റകൃത്യ നിരക്ക് ദേശീയ ശരാശരിയേക്കാൾ 25% കുറവാണ്.
2017 മുതൽ സംസ്ഥാനത്ത് നടപ്പിലാക്കിയ സീറോ ടോളറൻസ് നയത്തിന്റെ ഫലമാണ് ഈ നേട്ടത്തിന് കാരണം. 2012 നും 2017 നും ഇടയിലുള്ള അഞ്ച് വർഷത്തെ കണക്കുകൾ ആശങ്കാജനകമായിരുന്നു. ഡാറ്റ പ്രകാരം, 815 വർഗീയ കലാപങ്ങൾ നടന്നു. അതിൽ 192 പേർ മരിച്ചു. 2007 നും 2011 നും ഇടയിൽ 616 സംഭവങ്ങൾ നടന്നു, അതിൽ 121 പേർ മരിച്ചു.
ഇതിനു വിപരീതമായി 2017 ന് ശേഷം ഉത്തർപ്രദേശിൽ വലിയ കലാപങ്ങളൊന്നും ഉണ്ടായിട്ടില്ല. ബറേലിയിലും ബഹ്റൈച്ചിലും രണ്ട് അക്രമാസക്തമായ ഏറ്റുമുട്ടലുകൾ നടന്നു. പക്ഷേ യോഗി സർക്കാർ സ്ഥിതിഗതികൾ നിയന്ത്രണവിധേയമാക്കുകയും 24 മണിക്കൂറിനുള്ളിൽ സമാധാനം പുനഃസ്ഥാപിക്കുകയും ചെയ്തു. ബറേലി സംഭവത്തിൽ സ്വീകരിച്ച വേഗത്തിലുള്ള നടപടി ക്രമസമാധാനത്തെ കൂടുതൽ ശക്തിപ്പെടുത്തി.
മുഖ്യമന്ത്രി യോഗി ആദിത്യനാഥിന്റെ സുതാര്യമായ ഭരണവും കർശനമായ നിയമനടപടികളും കുറ്റകൃത്യങ്ങൾ വിജയകരമായി തടയാൻ സഹായിച്ചു. യോഗി സർക്കാരിന്റെ സീറോ ടോളറൻസ് നയത്തിന്റെ ഫലമാണ് എൻസിആർബി റിപ്പോർട്ട്.
